Вести
Мицкоски: Ја прекинуваме официјалната комуникација со власта
ВМРО-ДПМНЕ и коалицијата ќе ги стопира сите средби со власта, одлучил Извршниот комитет на најголемата опозициска партија. Ова го најави денеска лидерот на ВМРО ДПМНЕ, Христијан Мицкоски кој посочи дека оваа одлука била донесена едногласно. Потенцираше дека од сега повеќе нема да зборува за ништо што е поврзано со уставните измени, туку единствено за што би седнал на маса е за брзи предвремени парламентарни избори оваа есен.
„Комуникација со власта немаме, оваа недела имавме седница на Извршниот Комитет на партијата и донесовме едногласна одлука дека како ВМРО-ДПМНЕ ги прекинуваме сите комуникации официјални на билатерално ниво со претставници од владата. Има само една работа, а тоа е да седнеме и да се договориме околу изборите кога ќе бидат изборите, а како ќе бидат изборите, на кој начин – со техничка влада, немање техничка влада или се она кое што еповрзано од изборите“, рече Мицкоски.
Ова доаѓа откако на 7 јуни претседателите на СДСМ и ВМРО-ДПМНЕ, Димитар Ковачевски и Христијан Мицкоски на лидерска средба ја отворија вратата за уставни измени, но рекоа дека ќе се разгледуваат опциите како да се изведат. По ова следуваше натегање и двете страни ја повторуваат својата верзија од исходот.
Вчера премиерот Димитар Ковачевски најави дека уставните измени сепак ќе бидат поднесени во Собранието.
„Уставните измени ќе бидат поднесени во Собранието во текот на наредните две недели и ќе отпочне процес на дискусија согласно со процедура за истите во Собранието, таму каде што ѝ е местото. “, рече Ковачевски
Во врска со изборите рече дека нема да има наесен. Во изјавата не прецизираше дали се сретнал со лидерот на ВМРО-ДПМНЕ и дали има поддршка од опозицијата.
Инаку власта постојано тврдеше дека ВМРО-ДПМНЕ прифатила уставни измени. Опозициската партија пак убедуваше дека не е така и дека нема да прифатат уставни измени под бугарски диктат и во вакви услови. Односно, уставни измени да, но со важност откако Северна Македонија ќе стане членка на ЕУ.
Разликите околу менувањето на Уставот меѓу премиерот Димитар Ковачевски и лидерот на ВМРО-ДПМНЕ Христијан Мицкоски се во начините кога тие да бидат изгласани во Собрание и кога да стапат во сила.
Инаку, на лидерската средба меѓу премиерот Димитар Ковачевски и лидерот на ВМРО-ДПМНЕ Христијан Мицкоски, СДСМ предложи широка коалиција со сите партии кои се за евроинтеграција, но пратениците на ВМРО-ДПМНЕ да гласаат за уставните измени.
Опозициската ВМРО-ДПМНЕ го прифати предлогот со услов - влада на широка коалиција, но без ДУИ да учествува во неа и одложено важење на уставните измени. Додека ДУИ го прифати предлог да оди во опозиција, но само до одржување на избори, ако ВМРО-ДПМНЕ претходно гласа за уставните измени со стапување во сила веднаш по гласањето во Собрание.
види ги сите денешни вести
Најмалку 15 повредени во Флорида при судир на воз со противпожарно возило
Тројца пожарникари и десетина патници беа повредени во саботата на Флорида кога противпожарно возило со ротациони светла се движело преку шините на патеката на брз патнички воз откако почека да помине друг воз, покажуваат видео снимки од инцидентот.
Од сударот предниот дел на возот беше уништен, и дел од патниците во предниот дел се повредени. Властите соопштија дека тројцата повредени пожарникари се хоспитализирани и во стабилна состојба. Останатите 12 повредени патници од возот се пренесени во болница со полесни повреди.
„Предниот дел на тој воз беше целосно искршен, а имаше дури и некои делови од противпожарното возило заглавени во предниот дел на возот, но тоа го подели автомобилот точно на половина. Го подели противпожарното возило точно на половина, а остатоците беа насекаде“, изјави Емануел Амарал, очевидец на несреќата.
Федералната управа за железници најави дека ќе спроведе истрага. Портпаролот на Националниот одбор за безбедност на транспортот попладнето изјави дека сè уште собира информации за несреќата и дека сè уште не одлучиле дали да истражуваат.
Талибанците забранија отворени прозорци од кои може да се видат жени
Врховниот лидер на Талибанците издаде наредба со која се забранува изградба на нови станбените згради со прозорци кои имаат поглед кон областите што ги користат Авганистанките. Дополнително постоечките такви прозори треба да бидат блокирани.
Според соопштението објавено од талибанската влада во саботата, новите згради не треба да имаат прозорци низ кои може да се види „дворот, кујната, бунарот на соседот и другите области кои најчесто ги користат жените“.
„Гледањето жени кои работат во кујните, во дворовите или земаат вода од бунари може да доведе до несоодветни постапки“, се вели во декретот објавен на социјалната мрежа X порано позната како Твитер од владиниот портпарол Забихула Муџахид, јавува новинската агенција Франс Прес.
Градските талибански власти и другите институции ќе треба да ги следат градилиштата за да се осигураат дека не е можно да се погледне во куќите на соседите.
Во случај да постојат такви прозорци, на сопствениците ќе им се советува да подигнат ѕид или да го блокираат погледот „за да не ги вознемируваат соседите“, се наведува во декретот.
Откако Талибанците ја презедоа власта воо август 2021 година, присуството на жените на јавниот простор се намали, што ги натера Обединетите нации да го осудат „родовиот апартхејд“ на талибанската администрација.
Талибанските власти го забранија образованието за девојчињата и жените надвор од основното училиште, го ограничија вработувањето на жените и го блокираа нивниот пристап до парковите и другите јавни места.
Неодамнешниот закон им забранува на жените дури и да пеат или рецитираат поезија во јавност поради строгата примена на исламскиот закон. Законот налага и да го „прикријат“ гласот и да ги покриваат телата кога се надвор од дома.
Некои локални радио и телевизиски станици престанаа да емитуваат женски гласови. Талибанската администрација тврди дека исламскиот закон ги „гарантира“ правата на мажите и жените во Авганистан.
Приведен,па ослободен „полицискиот крт“ кој им „шепнал“ за акцијата на „Беланоца“
Министерството за внатрешни работи (МВР) потврди дека синоќа било приведено едно службено лице со кое бил извршен службен разговор во врска со кривично дело „Оддавање службена тајна“. Делото е поврзано со акции на полицијата извршени месецов против криминалната група „Беланоца-Барон“.
Според соопштението на МВР осомниченото службено лице било приведено на 28 декември.
„При што во полициска станица беше извршен службен разговор во врска со кривично дело ‘Оддавање службена тајнa’, одземен му е мобилен телефон, по што по насока на ОЈО лицето е ослободено“, велат од МВР.
Осомничениот е син на поранешниот министер за внатрешни работи од ДУИ, јавува ТВ Телма, повикувајќи се на полициски извори.
Тој е осомничен дека оддал информации до членовите на криминалната банда непосредно пред спроведувањето на акцијата на Обвинителството и МВР на 16 декември против 18 осомничени припадници на скопското подземје од кои осуммина од нив не пронајде. Тие како дел од криминалната банда „Беланоца-Барон“ се обвинети дека во период од 2020 до 2024 година, организирале убиства на вкупно 8 луѓе, при што тројца други биле ранети, а на три лица им бил загрозен животот.
Истрагата за протекувањето на информациите ја води Обвинителството за гонење организиран криминал. Републичкиот јавен обвинител Љупчо Коцевски во интервју за Радио Слободна Европа изјави дека е уверен оти информациите не протекле од кај нив.
„Во тој поглед јас како државен обвинител можам да ви гарантирам дека од страна на ЈО не протекуваат никакви информации за тоа што тие предистраги, тие мерки за следење со месеци биле активни и претходно и ниедна не пробила.
Акцијата е пробиена во завршна фаза односно ден два пред да се преземе официјално акцијата. Токму и на таа околност ЈО и сега истражува да дознае „кој е кртот“ на пробивање на акцијата, меѓутоа ете успеа два дена пред планираното да спроведе акција и дел од осомничените да ги уапси“, изјави Коцевски.
За полициската акција протекле информации од Министерството за внатрешни работи, и поради таа била спроведена во недела навечер, наместо во вторник како што било планирано. По спроведувањето на акцијата, министерот за внатрешни работи Панче Тошковски изјави дека е срамно тоа што протекле информациите.
„Порака до нечесните, срам е за македонски полицаец да учествува во поткопување на процесите кои треба да не довеат до правда и правичност и ќе следат во иднина постапки“, рече Тошковски на 16 ти декември.
Ова е трет пат по ред, како од полициските структури „протекуваат“ информации за полициски акции кои се спроведуваат против нарко-картелите.
Претходниот министер за внатрешни работи Оливер Спасовски по јануарската акција годинава кога беа уапсени седум луѓе од вкупно 16 осомничени за „увоз на кокаин“ од Перу и Бразил, изјави дека утврдиле дека во МВР има „кртови“ кои наскоро ќе бидат изнесени пред лицето на правдата.
На 4 ноември годинава МВР објави дека се уапсени пензионирани полицајци поради оддавање на оперативни информации.
Иако, тогаш не беше експлицитно посочено за кого се работи, но според соопштението наликуваше дека тие им давале информации на најголемиот нарко бос во земјава Шеваљ Муареми, кој според последните објави на социјалната мрежа Инстаграм е во Дубаи.
Најмалку седум загинати при израелскиот напад врз Газа
Агенцијата за цивилна одбрана во Газа соопшти дека воздушен напад погодил болница на 29 декември, при што загинале најмалку седум лица, додека Израел соопшти дека цел на нападот биле милитантите кои се криеле во зградата, која повеќе не е функционална.
Според Агенцијата за цивилна одбрана во Газа, воздушниот напад ги погодил горните катови на болницата Ал-Вафа во градот Газа.
Израелската војска соопшти дека извршила „прецизен напад“ насочен кон членовите на тимот за воздушна одбрана на Хамас - палестинската група означена како терористичка организација од страна на Соединетите Американски Држави и Европската Унија - кои, како што рече, дејствувале „од команден центар лоциран во зграда која порано била болницата Ал-Вафаа“.
„Оваа зграда во моментов не работи како болница“, соопшти израелската војска.
Министерството за здравство во Газа соопшти дека болницата сè уште функционира.
„Болницата Ал-Вафаа делумно работи, обезбедувајќи грижа за пациентите кои имаат телесен инвалидитет“, соопшти Министерството.
Нападот на болницата Ал-Вафаа се случи еден ден откако Израел ја заврши операцијата во болницата Камал Адван во северниот дел на Газа, напад за кој Светската здравствена организација соопшти дека ги принудил пациентите и персоналот да ја напуштат зградата.
Израелската армија го уапси и директорот на оваа болница Хосам Абу Сафије, велејќи дека е осомничен дека е член на Хамас.
Од 6 октомври, Израел ги фокусира своите воени операции на северот на Газа, велејќи дека има за цел да го спречи Хамас да се прегрупира. Меѓутоа, израелската војска изврши воздушни напади и гранатирања и во други делови на палестинската енклава.
Интерпол трага по водачот на секта чии членови живееле во БиХ и Северна Македонија
Меѓународната полициска организација Интерпол распиша потерница по водачот на сектата Лев Тахор, Џонатан Емануел Кардон Кастиљо (23).
„Кастиљо е баран од полицијата во Гватемала под обвиненија кои вклучуваат трговија со луѓе, силување и злоупотреба на малолетници“, се вели во потерницата на Интерпол.
Околу триесет членови на екстремната еврејска секта Лев Тахор останаа во Босна и Херцеговина на крајот на 2021 и почетокот на 2022 година. Дел од нив живееле и во Северна Македонија.
Службата за странци на Босна и Херцеговина тогаш објави дека станува збор за група од 37 државјани на Соединетите Американски Држави, Гватемала и Канада. Службата извршила надзор поради дојава од граѓани кои пријавиле дека „групата се однесува и изгледа чудно и се облекува чудно. Не разговараат со никого, бучни и гласни се додека вршат некои свои ритуали“.
„Странските државјани првично престојувале во областа на кантонот Сараево, по што се населиле во Источно Сараево“, соопшти Службата за работи со странци на Босна и Херцеговина.
„Со проверка на официјалната евиденција е утврдено дека лицата влегле во БиХ во текот на ноември 2021 година и дека престојуваат во БиХ врз основа на правото на безвизен престој“, беше објавено.
Надлежните безбедносни агенции извршиле дополнителни проверки на горенаведените лица, вклучително и евиденција на Интерпол, при што не е утврдено дека претставуваат закана за безбедноста.
Тие ја напуштија Босна и Херцеговина на 3 февруари 2022 година, откако истече периодот на безвизен престој од 90 дена за повеќето членови на групата.
Истиот период во Северна Македонија беа забележани членови на оваа група во Куманово. Дел од групата беше сместена во хотел во охридското село Горно Лакочереј. При пристигнувањето во земјава прво престојуваа во Куманово, од каде со полициско обезбедување се преместија во хотел Скопје.
Нивното невообичаено облекување и религиозните практики не минаа незабележано од локалците, а беше забележан инцидент при кој што беше нападната една од кумановските куќи каде беше сместена дел од групата. Локацијата на која беа сместени во Скопје се држеше во тајност, поради страв од напади.
„Луѓето непотребно се агресивни кон нас. Не бевме протерани од БиХ, тоа се само медиумски шпекулации, наш избор беше да заминеме оттаму согласно плановите, за потоа да дојдеме тука. Моментално немаме постојан престој, во потрага сме по земја каде ќе ни биде дозволено да ги практикуваме нашите човечки права и религиозни слободи, како што е запишано и во библијата. Во меѓувреме транзитираме, не знаеме кога тоа ќе се случи, но засега немаме планови за постојана дестинација“, изјави тогаш една од припадничките на Лев Тахор.
Групата која допатува во земјава во февруари 2022 година ја сочинуваат 37 лица од кои половината беа деца.
Од МВР тогаш повикаа на толеранција и соопштија дека членовите на групата имаат легални патни исправи, одобрен привремен престој во земјава, како и дека ги почитуваат законите.
Што се знае за Лев Тахор?
Лев Тахор на хебрејски значи чисто срце и има околу 250 членови. Тие имаат строги правила во врска со исхраната, облекувањето и верските обреди. Групата се соочи со повеќе обвиненија за сериозни злосторства откако беше основана во 1980-тите.
Членовите на Лев Тахор претходно беа осудени за киднапирање деца, педофилија, силување, малолетнички бракови, злоупотреба на деца. Познато е дека сектата има членови во Канада, Соединетите Американски Држави, Мексико, Гватемала и Израел.
Новинската агенција Асошиетед прес (АП) објави дека Џонатан Емануел Кардон Кастиљо е водач на сектата, повикувајќи се на извори од полицијата и обвинителството во Гватемала.
Кастиљо е државјанин на Гватемала, каде што е седиштето на Лев Тахор, и зборува хебрејски и шпански, се вели во соопштението.
Властите на Гватемала го претресоа комплексот Лев Тахора на 20 декември, по пријава за злоупотреба, и приведоа повеќе од 160 малолетници и 40 жени во заштитен притвор, пренесува Асошиетет Прес.
Вработени во службата за регистрација - осомничени за шверц на луксузни автомобили
Двајва вработени во управни служби за регистрација на возилата се меѓу десетмината осомничени за шверц на луксузни автомобили, соопшто Основното јавно обвинителство. Во нивното соопштение е наведено дека по спроведена претходна постапка и врз основа на обезбедените докази, Основното јавно обвинителство Скопје ќе поведе постапка против вкупно 10 лица за кои постои основано сомнение дека учествувале во дејствија криумчарење, фалсификување исправи и службени исправи, како и прикривање на стоки кои се предмет на криумчарење и царинска измама.
„ Лицата во текот на 2021 и 2022 година, со лажни документи и преправени броеви на шасија, внесувале во земјава автомобили кои биле предмет на меѓународна потрага, како и автомобили за кои на друг начин ја избегнувале царинската контрола“, се вели во соопштението.
Во него е посочено дека шверцуваните возила биле регистрирани во земјава и дел од нив по неколкупати меѓусебно си ги препродавале за да го прикријат криумчарењето, по што ги отуѓувале на крајни корисници.
„Еден од осомничените е државјанин на Република Грција и за него, со оглед на претходно воспоставената соработка меѓу Основното јавно обвинителство Скопје и грчките органи, кривичниот прогон ќе биде отстапен на Република Грција.“, е посочено во обвинителското соопштение.
Полицијата денеска вршеше претреси во Скопје, Битола, Неготино, Дојран, Гевгелија, во потрага по криминална група која шверцувала скапи возила од ЕУ.
Израелскиот премиер Нетанјаху на итна операција на простата
На израелскиот премиер Бенјамин Нетанјаху му е отстранета простатата во недела, 29 декември, соопшти неговиот кабинет. Оваа медицинска интервенција се случува во време на повеќе кризи, вклучително и војната во Газа и судењето за наводна корупција, објави новинската агенција Асошиетед прес.
75 годишниот Нетанјаху е дел од група постари светски лидери, меѓу кои и американскиот претседател Џо Бајден (82) и новоизбраниот претседател Доналд Трамп (78), чие здравје и кондиција се во фокус и дома и во странство поради нивната напредна возраст и последици кои би можеле да ги имаат.
Нетанјаху, кој имаше низа здравствени проблеми во последниве години, направи се за да го зајакне својот имиџ во јавноста како совршено здрав, енергичен лидер.
За време на неговото судење овој месец, тој се фалеше дека работел по 18 часа на ден, дури и ако тие долги часови биле придружени со цигари. Но, како лидер со најдолг стаж во Израел, таквата исцрпувачка работа во текот на вкупно 17 години на власт, исто така, може да го земе својот данок.
Адвокатот на Нетанјаху, Амит Хадад, во писмо до судот рече дека израелскиот премиер ќе биде целосно седативи за време на операцијата и ќе биде хоспитализиран „неколку дена“, барајќи да му се откаже тридневното сведочење оваа недела. Судот се согласи.
Вршителот на должноста премиер ќе биде назначен додека тој е подложен на медицинска процедура, иако не е веднаш јасно кој ќе се вклучи, изјави еден функционер за Асошиетед прес кој сакаше да остане анонимен, бидејќи не е овластен да разговара за деталите од процедурата со медиумите.
Со толку турбуленции во регион, здравјето на Нетанјаху за време на војната предизвикува грижа и за Израелците и за светот. Проблемите со простатата се чести кај постарите мажи, а закрепнувањето може да биде брзо.
Нетанјаху и претходно имал некои здравствени проблеми, вклучително и срцев проблем.
Минатата година, Нетанјаху беше итно пренесен во болница поради, како што рекоа лекарите, веројатно дехидрација, каде што остана во текот на ноќта, одложувајќи го тогашниот неделен состанок на владата.
На почетокот на оваа година, Нетанјаху имаше операција на кила, при што беше под целосна анестезија и онесвестен. Неговиот близок доверлив, министерот за правда Јарив Левин, беше вршител на должноста премиер за време на операцијата.
Азербејџан ја обвини Русија за прикривање на причините за авионската несреќа
Азербејџанскиот претседател Илхам Алиев на 29 декември ја обвини Москва дека се обидела да ја скрие причината за смртоносната авионска несреќа оваа недела и ја повика Русија да ја признае „вината“ за катастрофата, велејќи дека авионот бил соборен по грешка.
Алиев рече дека Баку жали што Москва „изнесе теории“ кои „јасно покажаа дека руската страна сака да го прикрие“ ова прашање.
„Признавањето на вината, навременото извинување на Азербејџан, која се смета за пријателска земја, и информирање на јавноста за тоа -- сето тоа беа мерки и чекори што требаше да се преземат“ изјави Алиев.
Претходно рускиот претседател Владимир Путин на азербејџанскиот лидер Илхам Алиев на 28 декември му рекол дека руската противвоздушна одбрана била активирана за да се одбие наводниот напад со украински беспилотни летала додека авион на Азербејџан ерлајнс се обидел да слета во рускиот град Грозни.
„Во ова време Грозни, (градот) Моздок и Владикавказ беа нападнати од украински борбени беспилотни летала, а руската воздушна одбрана ги одбиваше овие напади“, се наведува во соопштението од Кремљ за тоа што му рекол Путин на Алиев.
Меѓутоа, во него не е наведено дека Путин спомнал оти руската воздушна одбрана е одговорна за соборувањето на авионот, поточно дали руски проектил го соборил авионот.
Кога патничкиот авион со 67 луѓе се урна на брегот на Каспиското Море во Казахстан рано на 25 декември, руските власти и државните медиуми беа брзи во посочувањето на можните причини: густа магла, удар од птица и потоа се појавија снимки кои покажуваат оштетување на моторот пред несреќата и експлозија на резервоар за кислород во кабината.
Доказите, од кои голем дел не се потврдени од властите во Азербејџан, Казахстан или Русија, вклучуваат снимки од внатрешноста на авионот пред падот, слики по несреќата од делот од опашката на авионот со дупка, коментари на преживеан и профили кои укажуваат дека имало сомнителен напад со дрон околу времето кога авионот очигледно се обидел да слета во Грозни.
Втора скијачка несреќа во еден викенд на Светскиот куп во Италија
Швајцарскиот скијач Џино Кавизел доживеа тешка несреќа за време на Светскиот куп во Бормио, Италија во неделата на 29 декември и мораше да биде префрлен во болница со хеликоптер.
Кавизел беше првиот што се спушти, но неговиот спуст траеше едвај 50 секунди. На портата пред скокот во Сан Пјетро, 32-годишникот фатил раб, изгубил баланс при скијање и се лизнал надолу по стрмната падина.
Кавизел остана да лежи на патеката и доби третман пред да биде префрлен со хеликоптер, при што беше прекината трката.
Претходно , францускиот скијач Сиприен Саразин во саботата на 28 декември успешно беше опериран со цел спречување на крварење во мозокот откако падна додека тренираше за спустот за Светскиот куп во Бормио во петокот.
Седумдневна жалост во Јужна Кореја по авионската несреќа
Вршителот на должноста претседател на Јужна Кореја, Чои Санг-мок, на итен состанок во неделата вечерта, прогласи седум дневна национална жалост до 4 јануари поради авионската несреќа на меѓународниот аеродром Муан.
Најмалку 177 луѓе загинаа на 29 декември откако откако патнички авион се урна при слетување на аеродром во Јужна Кореја. На летот на нискобуџетната авиокомпанија „Џеџу ер“ со „боинг 737-800“ имаше 181 патник и пристигнуваше на аеродромот Муан, околу 290 километри јужно од Сеул, од Бангкок, Тајланд.
Авионот се излизга од пистата на аеродромот и се удри во бетонска ограда и се запали откако неговата предна опрема за слетување очигледно не успеа да се спушти. Бројот на загинати се очекува дополнително да се зголеми бидејќи останатите луѓе во авионот се водат како исчезнати околу шест часа по инцидентот.
Двајца членови на екипажот, маж и жена, беа спасени од опашката на запалениот авион, изјави на брифинг шефот на противпожарната служба на Муан, Ли Јунг-Хјун.
Ова е најтешката и најсмртоносната авионска несреќа во која учествувала јужнокорејска авиокомпанија во речиси три децении.
Мултимедија
Најпосетени
Што треба да знаете