Украинската војска на 12 ноември соопшти дека спровела „мерки за стабилизација“ во близина на Херсон по завршувањето на осуммесечната окупација од страна на руските сили.
Генералштабот на вооружените сили на Украина, на социјалните мрежи, соопшти дека Русите ги зајакнуваат своите борбени линии на источниот брег на реката откако го напуштиле градот. Околу 70 проценти од регионот Херсон останува под руска контрола.
Со повлекувањето од Херсон дополнително се намалуваат плановите на рускиот претседател Владимир Путин да преземе големи делови од Украина.
Повлекувањето на Русија од украинскиот град Херсон e „извонредна победа“ за Украина, оцени Белата куќа на 12 ноември.
„Изгледа дека Украинците штотуку извојуваа извонредна победа во која единствениот регионален главен град што Русија го зазеде во оваа војна сега е повторно под украинско знаме и тоа е доста извонредна работа“, рече советникот за национална безбедност на САД, Џејк Саливан пред новинарите додека го придружуваше американскиот претседателот Џо Бајден на Самитот на земјите од југоисточна Азија (АСЕАН) во Камбоџа.
Изјавата на Саливан доаѓа на неколку часови откако украинскиот претседател Володимир Зеленски изјави дека Херсон е „наш“, откако неговите специјални сили влегоа во стратешкиот јужен град по повлекувањето на руските трупи. Тоа значи уште една драматична победа на бојното поле во обидот на Киев да ја врати територијата окупирана од Русија од почетокот на нејзината неиспровоцирана инвазија.
Ситуацијата во Херсон, исто така, ја коментираше и британскиот секретар за одбрана Бен Валас. Тој на 12 ноември рече дека „стратешкиот неуспех“ на Москва во Херсон ќе посее сомнеж кај руската јавност за поентата на војната во Украина.
„Најавеното повлекување на Русија од Херсон претставува уште еден стратешки неуспех за нив. Во февруари Русија не успеа да постигне ниту една од своите главни цели, освен Херсон. Сега кога и тоа се предава, обичните луѓе во Русија сигурно мора да се запрашаа - За што беше сето ова“, изјави Валас.
Во Херсон, пак, според објавени видео снимки на интернет, се гледаат луѓе како го веат националното знаме на Украина и скандираат додека украинските војници пристигнуваат во градот. Фотографии кои кружат на социјалните мрежи на 12 ноември покажуваа дека украинските активисти ги отстрануваат плочите поставени од окупаторските власти што Кремљ ги постави за да управува со регионот Херсон.
„Ги добиваме битките на теренот, но војната продолжува“, рече министерот за надворешни работи на Украина, Дмитро Кулеба, откако Украина си го поврати Херсон.
Говорејќи на самитот на Југоисточна Азија во Камбоџа на 12 ноември, Кулеба рече дека враќањето на градот е „прилично напорно“.
„Разбирам дека сите сакаат оваа војна да заврши што е можно поскоро. Дефинитивно ние сме тие што го сакаме тоа повеќе од кој било друг“, рече Кулеба за време на средбата со австралискиот премиер Ентони Албанезе на маргините на самитот.
Саливан рече дека руското повлекување ќе има „пошироки стратешки импликации“, вклучително и олеснување на долгорочната закана од Русија за другите јужни украински градови, како што е Одеса.
„Ова е значаен момент за кој се заслужни упорноста и вештините на Украинците, кои неуморно ги поддржуваат САД и сојузниците“, рече Саливан.
Русија да одлучи дали сака да седне на преговарачка маса
Запрашан за извештаите дека администрацијата на Бајден почнала да го притиска Зеленски да размисли за преговори со Москва, Саливан рече дека Русија, а не Украина, е страната што треба да одлучи дали ќе седне на преговарачка маса или не.
Русија, додаде тој, продолжува да изнесува „необични тврдења“ за своите самопрогласени анекси на украински земји, дури и кога се повлекува од украинските контра напади.
„Украина е страна на мирот во овој конфликт, а Русија е страна во војната. Русија ја нападна Украина. Ако Русија одлучи да престане да се бори во Украина и да се откаже, тоа ќе биде крајот на војната. Ако Украина одлучи да престане да се бори и се откаже, тоа ќе биде крај за Украина“, рече тој.
Во тој контекст, нашата позиција останува иста како што беше и во основа е во тесна консултација и поддршка со претседателот Зеленски, рече Саливан.
Во исто време, украинската армија објави видео посветено на ослободувањето на Херсон. Во него се наведува дека жителите на Херсон никогаш не им се предале на руските окупатори и потсетува дека Украинците во Херсон протестирале против руската окупација.
„Никогаш не се откажавме од нив. Еден народ, една земја, една борба. Колку што е потребно“, се наведува во видеото на кое се гледаат снимки од жителите на Херсон кои радосно ги пречекуваат ослободителите.
Украинските власти соопштија и дека во текот на ноќта на 12 ноември руската армија со тешка артилерија гранатирала неколку области на регионот Дњепропетровск, при што биле уништени станбени згради во некои населени места.
Меѓународната агенција за атомска енергија (МААЕ) на 11 ноември објави дека Харковскиот институт за физика и технологија е оштетен многу полошо од очекуваното, но дека за среќа нивото на радијација се уште е нормално.
Заменик-генералниот директор на Институтот во разговор со инспекторите на МААЕ изјави дека зградата на Институтот претрпела повеќе од 100 напади со проектили и гранати само во првите три недели и повеќе од еден месец била без струја и вода.
