Обединетото Кралство во четвртокот санкционираше пет грузиски функционери, вклучително и министерот за внатрешни работи, за насилно задушување на демонстрациите што избија по одлуката за „замрзнување“ на преговорите за членство на Грузија во Европската унија (ЕУ).

Групи грузиски граѓани излегоа на улиците речиси секој ден, откако грузиската влада минатиот месец ги одложи преговорите за пристапување во ЕУ до 2028 година, пишува Ројтерс.

Британското Министерство за надворешни работи објави дека санкционираните грузиски функционери се одговорни за насилството врз новинарите и граѓаните кои се собраа на протестите.

Видете и ова:

Унгарија и Словачка ги блокираат санкциите на ЕУ против Грузија

Грузија се сметаше за една од демократските и прозападните земји на поранешниот Советски Сојуз, но критичарите велат дека таа сега се движи во авторитарна и проруска насока.

Владејачката партија Грузиски сон тврди дека сака демократска и прозападна Грузија, но во исто време негува прагматични врски со соседна Русија, која владееше со Грузија до 1991 година.

Политичката криза во Грузија избувна по победата на Грузискиот сон на парламентарните избори, а ескалираше по неодамнешната одлука за одложување на преговорите на земјата со ЕУ.

Властите бурно реагираа на демонстрациите, апсејќи стотици луѓе и ги надгледуваа демонстрантите со камери за препознавање лица.

На премиерот Христијан Мицкоски вчера му порачав дека треба да се намали „острината на изјавите“, пред се од македонска страна, бидејќи, како што знаете, Бугарија „ништо и не кажува“, изјави денеска шефот на бугарската техничка Влада, Димитар Главчев во Брисел, каде учествува на Самитот на ЕУ.

„Јазикот на омразата не треба да продолжи. Можеме да водиме секакви дијалози, но нашата позиција не е променета, рече Главчев.

Според него, иако нема промена на бугарската позиција, сепак е добро да се почне да се разговара за европските односи со добар европски тон, каков што треба да се користи меѓу држава членка и кандидат за членство во Европската Унија.

за премиерот Христијан Мицкоски пак секој кој ќе отвори тема за идентитетските прашања не мисли добро на соседот, а уште помалку ги почитува европските вредности. Македонија никому не оспорува ништо и не сакаме нас да нè оспоруваат, изјави денеска премиерот Христијан Мицкоски.

Видете и ова:

Борисов: Многу процеси за Северна Македонија се одвиваа без учество на Бугарија

„Доколку билатералните разговори и преговори се однесуваат на идентитетските прашања, тогаш тука тој процес никако не може да заврши успешно, бидејќи е поврзан со емоцијата, а не со рационалното. Секој оној процес којшто е поврзан со емоцијата не може да биде процес којшто ќе се темели на напредок, на квалитет и на испорака на резултати. Затоа, замолив емотивните билатерални прашања да ги оставиме на страна и да ги читаме правилно договорите. И двата договора велат дека земјите-членки коишто се втора страна, во едниот Грција, во другиот Бугарија, треба безусловно да нè поддржуваат. Никаде во Договорот за добрососедство не стои делот којшто нас нè обврзува на уставни измени. Потребно е правилно да ги гледаме работите, на вистината да ѝ погледнеме во очи, а не онака нас како што ни одговара, изјави премиерот Мицкоски.

Запрашан на кој јазик разговарале со Мицкоски, Главчев одговори дека тој зборувал на бугарски, додека ќе треба да го прашаат македонскиот премиер „на кој јазик говори“.

Премиерот Мицкоски вчера во Брисел учествуваше на Самитот ЕУ-Западен Балкан заедно со лидерите на земјите членки на Унијата и на државите од регионот.

Вели дека билатерална соработка треба да има онаму каде што има рацио, додека билатерална соработка каде што има идентитетски прашања не доаѓа в предвид.

Билетарниците на Јавното сообраќајно претпријатие „Скопје“ не им ги продолжуваат годишните карти за наредната година на студентите за бесплатен јавен превоз во главниот град. Претседателот на Универзитетското студентско собрание на Универзитетот „Св. Кирил и Методиј“, Александар Николоски, изјави дека веќе пратиле апел до Владата, Министерството за образование и наука, Советот на Град Скопје, градоначалничката Данела Арсовска и до ЈСП „Скопје“, како што рече, „да се произнесат јавно дали се предвидени средства за бесплатен превоз на студентите во градот Скопје“.

„Затоа што билетите за 2025 не се продолжуваат на билетарниците на ЈСП. Од друга страна, од МОН се произнесоа дека се предвидени средства. Во текот на септември градоначалничката имаше дадено изјава дека има заостанат долг во неколку милиони денари којшто треба да се плати, покрај од страна на Министерството и Владата. Останува да почекаме одговор од страна на институциите“, изјави Николоски.

На прашањето какво образложение добиле од институциите, рече дека „дел кажуваат дека нема да има бесплатен градски превоз“, а од ЈСП во телефонска комуникација им било кажано дека „се уште се чека одлука од Град Скопје“.

Доколку останат без бесплатен превоз, една од опциите, рече Николоски, е да протестираат пред институциите.

Видете и ова:

ЈСП и Комунална Хигиена возат „на резерва“

„Другата опција е активно да комуницираме и да притискаме мерката да продолжи затоа што ако МОН предвидело средства, треба МОН и Град Скопје како одговорни институции да се договорат што ќе прават со заостанатиот долг, а тековно да си продолжи бесплатниот градски превоз како мерка за студентите, додаде Николоски.

На промоцијата присуствуваше и заменик-министерот за образование и наука Лулзим Алиу кој на прашањето за проблемот со бесплатниот превоз на студентите во Скопје, колку пари должи МОН и дали се обезбедени средства во буџетот, кој Собранието го усвои минатата недела, не одговори конкретно.

-Можам да кажам дека во буџетот за 2025 се предвидени средства за транспорт на студентите, но за тоа ќе треба да се донесе дополнителна одлука од страна на Владата. Буџетот треба да помине на Собрание, да не кажуваме бројки кои може да бидат изменети и додека се носи буџетот, рече Алиу.

Форумот за образовни промени (ФОП) денеска промовираше иницијатива за субвенциониран студентски превоз за редовни студенти кои студираат надвор од местото на живеење.

Предлогот има две опции – првата е месечна карта за десет патувања што би чинела околу 1.100 денари и втора опција е месечен билет за неограничен број на патувања што би чинел околу 2.150 денари. Нагласи дека со ваква субвенција ќе се намали финансискиот товар на студентите и нивните семејства.

Градежниот факултет на Белградскиот универзитет соопшти дека во објавената документација за реконструкција на железничката станица во Нови Сад, недостига, како што се наведува, клучна документација.

Владата на Србија, под притисок на јавноста, на својата веб-страница ја објави документацијата за реконструкцијата на станицата, која официјално беше отворена во јули, а каде по падот на бетонската настрешница во ноември загинаа 15 лица, а двајца беа тешко повредени. 1.

Надлежните тврдат дека објавената документација е комплетна.

Но, од белградскиот Градежен факултет велат дека врз основа на нивната прелиминарна анализа, во објавените документи, меѓу другото, недостига дел од проектната документација - идејниот проект, проектот за одобрението за градба, проектот за градбата и проектот за готовиот објект.

Тие наведуваат и дека недостигаат изјави од инвеститори, изведувачи и стручен надзор дека работите се вршеле од сите аспекти според проектот за изведба.

Понатаму велат дека недостигаат и сите договори и анекси на договори со подизведувачи.

Посочуваат и дека недостигаат најмалку осум предмети поврзани со документацијата на градилиштето, како и дел од документацијата што е во надлежност на инвеститорот и надлежност на Републичката градежна инспекција.

Реконструкцијата на железничката станица во Нови Сад траеше три години.

Видете и ова:

„Мислам, затоа блокирам“ - собир за поддршка на студентските блокади во Нови Сад

Од објавената документација што ја анализира Радио Слободна Европа, произлегува дека работите на железничката станица во Нови Сад не биле завршени во моментот на несреќата, иако во јули официјално била отворена во присуство на официјални лица.
По падот на настрешницата, првите изјави на изведувачот и претставници на министерството беа дека таа „не е предмет на реконструкција“.

Сепак, дел од вештаците кои се занимаваа со реконструкцијата, како и фотографиите и видеата кои беа анализирани деновите по несреќата, ги демантираат тие наводи.

Обвинителството осомничи 13 лица, меѓу кои и поранешниот министер за градежништво, Горан Весиќ, за пропусти во врска со реконструкцијата на станицата.

По несреќата следеа масовни протести, а едно од барањата на опозицијата, дел од граѓаните, но и студентите кои изминативе неколку недели ја блокираа работата на факултетот беше да се објави целата документација.

Под притисок на јавноста, српскиот претседател Александар Вучиќ на 11 декември најави дека на веб-страницата на Владата ќе бидат објавени 195 документи, тврдејќи дека тоа се целосни документи.

Некои експерти, предводени од инженерот Зоран Ѓајиќ, како и неколку невладини организации, изразија сомнеж дека е објавена целосната документација.

Сомнеж изразија и студентите кои ја блокираат работата на десетици факултети, тврдејќи дека нивното барање за објавување документи не е целосно исполнето.

По вонредниот инспекциски надзор на Детската клиника откако почина седуммесечно бебе, Државниот санитарен и здравствен инспекторат (ДСЗИ) предлага Министерството за здравство да покрене постапка за стручен надзор над лекувањето на бебето.

Од извршениот вонреден инспекциски надзор констатирано е дека на Детската клиника се уште не е решен проблемот со задолжителното присуство на специјалист во дежурната амбуланта, за што се води прекршочна постапка, како и дека медицинската документација се креира од страна на доктори кои не се присутни на работа за што од страна на ДСЗИ е издадено решение чии рокови течат.

„ДСЗИ констира дека седуммесечното бебе првпат во ЈЗУ УК за детски болести - Скопје било донесено на ден 9 декември 2024 година заради висока температура и осип по целото тело од пред една недела. Првично, детето е прегледано од страна на специјализанти, во консултација со доктор специјалист и упатено е на дополнителни испитувања на Инфективна клиника, Клиника за дерматовенерологија и во Биохемиска лабораторија при Детска клиника. По добиените резултати и препишаната терапија, испратено е на домашно лекување со насока за контрола кај матичен лекар и по потреба на Детска клиника“, појаснуваат од ДСЗИ.

Видете и ова:

Вонреден инспекциски надзор на Детската клиника за починатото бебе

На 11 декември, во вечерните часови, детето повторно било донесено на Клиниката и заради влошената клиничка слика, тоа било хоспитализирано на Одделот за неврологија. Креирани му биле упати за повеќе испитувања, а на 13 декември заради натамошно влошување на здравствената состојба, бебето било префрлено на Одделот за интензивна нега и терапија.

„По стабилизирање на состојбата, повторно е вратено на Одделот за неврологија, каде престојувало неколку часа, по што повторно е вратено на ОИНТ, каде се направени дополнителни радиолошки, ехогравски и други лабораториски испитувања, што укажуваат на тешка општа состојба на детето, што во вечерните часови на ден 15 декември 2024 година, завршува со смрт“, додаваат од Инспекторатот.

Од ДСЗИ информираат дека ќе биде издадено решение со наредба за почитување на одредбите од член 226 од Законот за здравствената заштита за прием на пациенти прегледани како итни случаи. Како што додаваат, доколку прием не е извршен, установата е должна да издаде писмено образложение за причините за одбивањето на приемот за болничко лекување.

Откако во јавноста излезе веста за смртта на бебето, директорот на Детската клиника, Реџеп Мемеди рече дека биле запазени сите процедури и третмани и дека нема лекарска грешка.

Тој тврдеше дека се работи за неоснован притисок врз Клиниката и здравствениот персонал во оваа институција.

За неколку месеци ова е четврто починато дете на Детската клиника. Последниот случај беше со петтгодишно девојче кое почина од воспаление на мозокот.

Како што германската економија продолжува да пропаѓа, сè помалку компании сакаат да вработат нов персонал, а повеќе размислуваат за отпуштање покажува новата анкета на институтот Ифо, лоциран во Минхен.

Како што пренесува ДПА, месечниот барометар за вработување на институтот Ифо, кој се базира на редовна анкета на околу 9500 германски компании, повторно паднал во последниот извештај објавен денеска (19 декември).

Барометарот го достигна најниското ниво од падот во 2020-та година, кога имаше ковид пандемија.

Сепак, за разлика од почетокот на пандемијата, годинава падот не е ненадеен, туку е речиси континуиран.

„Сè помалку и помалку компании вработуваат нов персонал. Но процентот на оние кои сакаат да ги намалат работните места се зголемува", изјави директорот на истражувањето, Клаус Волрабе.

Видете и ова:

Германија го олесни влезот за баратели на работа од земји кои не се членки на ЕУ

Според истражувањето, првенствено индустриските производители и трговците на мало сакаат да ги намалат работните места.

Германија веќе некое време се соочува со економска стагнација.

Пред неколку дена германскиот канцелар Олаф Шолц на 16 декември го загуби гласањето за доверба во Бундестагот, со што се отвори патот за предвремени избори на крајот на февруари во најнаселената земја-членка на Европската Унија со најголема економија.

Шолц ја предводеше малцинската влада откако неговата непопуларна трипартиска коалиција се распадна на 6 ноември, кога беше отпуштен министерот за финансии во спор околу тоа како да се ревитализира економијата на Германија која е во стагнација.

Само од јануари до октомври годинава општините потрошиле на пејачи и на други забавувачи 961 илјада евра. До крајот на 2024 година се очекува дека сумата ќе надмине еден милион евра. Ова го покажува последното истражување на Центарот за граѓански комуникации.

Според наводите на истражувањето, лани за оваа намена се потрошени 1 милион и 11 илјади евра.

Најскапо платена годинава е Северина за која Крива Паланка платила 25 илјади евра.

Сепак, годинава, најмногу пари добила Јелена Розга бидејќи имала два настапи, во Берово и во Штип. За двата настапа и биле исплатени 42 илјади евра.

Лани, најскапо бил платен Саша Ковачевиќ, кој од Штип добил речиси 26 илјади евра.

Најмногу пари на забавни манифестации трошат општините Кавадарци, Струмица, Штип, Кисела Вода и Велес.

Видете и ова:

Владата пред избори им вети повеќе пари на новите градоначалници

Овие услуги општините ги набавуваат преку помалку транспарентни постапки или наоѓаат начини да не го применат Законот за јавните набавки, велат од Центарот за граѓански комуникации.

Вакви трошоци имале 50 општини. Од другите, 29 немаат, а две не доставиле податоци.

„Забавните манифестации што општините ги организираат по разни поводи, како одбележување празници (Нова година) или нешто што е специфично за таа општина (храна, пијалак, традиција и сл.), ги чинат граѓаните повеќе од 1 милион евра секоја година“, се наведува во истражувањето на ЦГК.

Инаку тие се пари што општините ги плаќаат од своите буџети и во сумата не влегуваат парите што за оваа намена се платени преку донации, најчесто од фирми и поединци.

Рускиот претседател Владимир Путин ја одржува традиционалната прес-конференција и телевизиска конференција за крајот на годината, настан што го искористи за да го зајакне својот авторитет и да ја покаже својата огромна контрола врз политичката сцена во земјата.

„Економијата е важна, да почнеме со неа и покрај провокативните прашања“, рече на почетокот Путин и додаде дека економската состојба во земјата е стабилна и додаде дека годинава растот на БДП во Русија може да биде 3,9 или 4 проценти.

Путин потоа додаде дека Русија е пред Европа, а Кина, САД и Индија се пред Москва во однос на економскиот развој.

„Еврозоната спие, но тоа не значи дека нема нови економски можности. Приходите на населението пораснаа, но имаме некои проблеми со инфлацијата, можеби економијата е прегреана и централната банка си постави барање да ги намали инфлација“, рече Путин.

Во исто време, приходите на домаќинствата растат над инфлацијата. Генерално, ситуацијата е стабилна и сигурна, тврди Путин.

Економскиот раст во голема мера е резултат на зајакнувањето на суверенитетот, вели тој. „Некои производители го напуштија рускиот пазар, што доведе до фактот дека нашите претприемачи почнаа сами да ги произведуваат овие производи. Ова е особено важно за нашата земја“, рече тој.

Тој беше прашан за поскапувањето, особено на лебот и горивото.

Тој одговори дека потрошувачката на некои стоки е зголемена над залихите и дека Русите јадат месо „значително“ над светскиот просек. Што се однесува до путерот, вели дека не се произведува доволно млеко за да се задоволи побарувачката на тој производ.

Путин понатаму вели дека растот на цените е лош, но дека ќе се намали со одржување стабилни макроекономски услови.

Видете и ова:

Годишна прес-конференција на Путин

„Победата е се поблиску“

Потоа следеше прашање за војната на Русија во Украина или, како што ја нарекува Кремљ, „специјална воена операција“. Путин беше прашан дали „победата е близу“.

Рече дека ситуацијата „драстично се менува“ и дека руските војници секојдневно „заземаат територии“.

„Војната е комплицирана“, рече тој и додаде дека „сè поблиску сме до решавање на нашите примарни задачи од специјалните операции“.

Путин, одговарајќи на дополнителни прашања од гледачите, рече дека не може да одреди датум кога Русија ќе ја врати контролата врз регионот Курск по украинската офанзива претходно оваа година.

„Нема воена смисла Украина да влезе во регионот Курск“, посочи тој, додавајќи дека „сигурно ќе се ослободат од нив“.

„Се ќе се изгради. Во тоа нема сомнеж. Ќе се обноват и училиштата, градинките, патната инфраструктура“, најави тој и додаде дека на секому кому му е уништен домот ќе добие отштета.

Подготвен да се сретне со Трамп

Рускиот претседател изјави дека е подготвен за разговори „во секое време“ со новоизбраниот американски претседател Доналд Трамп, кој во изборната кампања повторуваше дека ќе постигне мировен договор со Украина во рок од неколку часа по доаѓањето на функцијата.

Запрашан за предлозите на Трамп во врска со можниот мировен договор, Путин ја поздрави средбата со идниот републиканец.

"Не знам кога ќе го видам. Тој не кажува ништо за тоа. Не сум разговарал со него повеќе од четири години. Подготвен сум на тоа, се разбира. Во секое време." рече Путин и додаде:

„Ако некогаш имаме средба со новоизбраниот претседател Трамп, сигурен сум дека ќе имаме многу да разговараме“, рече тој, додавајќи дека Русија е подготвена за „преговори и компромиси“.

Кремљ неодамна ги поздрави острите критики на Трамп за одлуката на претседателот Џо Бајден да му дозволи на Киев да користи ракети доставени од САД за да ја нападне руската територија.

Видете и ова:

Украина тврди дека севернокорејски војници биле убиени и ранети во Курск

„Падот на Асад, не е пораз за Русија“

Според Путин падот на поранешниот сириски лидер Башар ал Асад не е „пораз“ за Русија, и тврди дека Москва ги постигнала своите цели во земјата.

Асад побегна во Москва на почетокот на овој месец по шокантното напредување на бунтовниците кое стави крај на половина век владеење на семејството Асад, обележано со репресија и обвинувања за огромни прекршувања на човековите права и граѓанска војна.

Русија беше клучниот поддржувач на Асад и му помогна во 2015 година, што го сврте бранот на конфликтот.

„Сакате да го претставите она што се случува во Сирија како пораз на Русија? Ве уверувам дека не е. Дојдовме во Сирија пред 10 години за да не се создаде терористичка енклава како во Авганистан. Во целина, ја постигнавме нашата цел“, рече Путин.

Лидерот на Кремљ рече дека допрва треба да се сретне со Асад во Москва, но планира да го стори тоа наскоро.

„Сè уште не сум го видел претседателот Асад од неговото пристигнување во Москва, но планирам, дефинитивно ќе разговарам со него“, рече тој.

Сиријците слават ширум земјата, Блискиот Исток и европските градови, откако бунтовниците ја презедоа контролата врз главниот град Дамаск по молскавична офанзива, ставајќи крај на бруталното владеење на семејството Асад, кое владееше со железна тупаница од 1971 година.

Инаку прашањата и одговорите за новинарите е комбинирано со телевизиската програма „Резултати на годината“, каде граѓаните можат да му поставуваат прашања на претседателот.

Собирањето на прашања од јавноста започна на 8 декември. Еден ден пред настанот, руските граѓани испратија над 1,6 милиони прашања. Минатогодишната комбинирана сесија траеше повеќе од четири часа, додека најдолгата „директна линија“ беше во 2013 година, која траеше речиси пет часа.

Повеќето прашања се вртат околу „специјалната воена операција“, како што Москва официјално ја нарекува својата инвазија на Украина, и здравствената заштита, изјави портпаролот на Кремљ, Дмитриј Песков.

Сиромаштијата, социјалните тешкотии и поплаките за здравствената заштита и недостигот на инфраструктура се теми кои се повторуваат во сесиите за прашања и одговори, во кои Путин се обидува да се претстави како клучна фигура во решавањето на проблемот.

Низата интензивни израелски воздушни напади ги погодија и главниот град на Јемен, Сана и пристанишниот град Ходаја, убивајќи најмалку девет лица, објавија медиумите кои се под контрола на Хутите.

Ал Масира ТВ, главната телевизиска куќа со која управува јеменското движење Хути што го контролира поголемиот дел од земјата, информираше дека седуммина се убиени во израелскиот напад на пристаништето Салиф, а две лица загинале во нападот на нафтената фабрика Рас Иса.

Нападите исто така, имале за цел и две централни електрани јужно и северно од главниот град Сана.

Во соопштението, израелската војска наведе дека „извела прецизни удари на воените цели на Хутите во Јемен, вклучувајќи ги пристаништата и енергетската инфраструктура во Сана".

Видете и ова:

Русија и јеменските Хути обединети против Западот

„Ги предупредувам водачите на терористичката организација Хути: долгата рака на Израел ќе дојде и до вас“, наведе израелскиот министер за одбрана, Кац во објава на социјалната мрежа Икс.

Претходно денеска (19 декември), израелската војска соопшти дека пресретнала проектил лансиран од Јемен.

Хутите кои го поддржуваат Иран, а САД ги смета за терористичка организација, отпочнаа со напади на меѓународни бродови во близина на Јемен од минатиот ноември, во знак на солидарност со Палестинците во израелската војна со Хамас. И Хамас е прогласена за терористичка организација од САД и ЕУ.

Видете и ова:

Израелската армија тврди дека го нападнала командниот центар на Хамас во Газа

Израелската војска уби над 45000 Палестинци, расели околу 2,3 милиони жители и ја опустоши крајбрежната енклава, оставајќи ги жителите во недостиг на храна, вода, лекови и уништени болници.

Поради војната, Израел се соочува со тужба за геноцид пред Меѓународниот суд на правдата.

За Украина е особено важно од почеток на следната година да постои единство меѓу САД и европските земји, порача украинскиот претседател Володомир Зеленски пред почеток на денешниот Самитот на ЕУ во Брисел.

„Тоа е особено важно, затоа што тоа единство ни е потребно за да обезбедиме мир. Само заедно, САД и Европа навистина ќе може да го запрат рускиот претседател Владимир Путин и да ја спасат Украина“, изјави Зеленски при доаѓањето на Самитот во придружба на претседателот на Европскиот совет, Антонио Кошта.

Зеленски притоа се заблагодари за европската поддршка за украинскиот народ и го поздрави единството што постои во ЕУ по ова прашање, нагласувајќи дека со европските лидери ќе разговара за итните потреби на Украина во зајакнувањето на нејзината инфраструктура.

„Наш врвен приоритет, и за тоа ќе разговараме денес, е заштита на нашиот енергетски сектор. Тука говорам и за сигурноста на нуклеарните централи, што може да претставуваат опасност не само за Украина, туку и за Европа ако нешто тргне како што не треба, како и за заштитата на складиштата со гас, кои исто така се важни и за Украина и за другите Европејци“, рече Зеленски.

Видете и ова:

Лидерите на ЕУ и земјите од Западен Балкан на самит во Брисел

Тој додаде дека, според него, потребно е и удвојување или зголемување колку што е можно повеќе на украинското одбранбено производство од што зависи резултатот на бојното поле, како и обезбедувањето на сигурноста на училиштата, што е особено важно за украинските деца и нивните семејства.

Кошта од своја страна порача дека ЕУ мора да бидеме многу јасна дека Украина може да смета на нејзината целосна поддршка за што и да e и онолку колку што е потребно и сега во време на војна и во иднина во услови на мир. Тој потенцираше дека ЕУ ќе продолжи да ја поддржува и да работи со Украина за таа да извојува победа во војната и да обезбеди сеопфатен, праведен и одржлив мир.

„Оваа војна е во Украина, е против украинските граѓани, е на европска почва и ги крши универзалните принципи наведени во Повелбата на Обединетите Нации, како правото на самоопределување, правото на територијален интегритет и право на безбедни граници. Затоа оваа војната не е само за Украина и не е само за Европа, туку е и за меѓународното право. Правото мора да надвладее и инвазијата мора да биде поразена“, изјави Кошта.

Зеленски учествува на делот од Самитот на ЕУ посветен на состојбата во Украина и треба да ги информира своите колеги за најновите случувања на теренот и за неговите ставови за тоа како Европа може најдобро да ја поддржи неговата земја.