ВМРО-ДПМНЕ денеска ја започна иницијативата за собирање на потписи против пописот кој власта сака да го спроведе во земјата. Собирањето потписи започна на десетици пунктови ширум земјата.
Прв меѓу луѓето кои се потпишаа беше лидерот на ВМРО-ДПМНЕ Христијан Мицкоски, кој на Фејсбук напиша дека го дал својот потпис против „фалсификат попис“.
„Да поддржиме европски и вистински попис. Да спречиме кражба, да ја тргнеме политиката од статистиката“, стои во објавата на Мицкоски.
На ова одговори пратеничката и претседателка на Форумот на жени на СДСМ Снежана Калеска – Ванчева. Таа рече дека по цели 19 години, државата, конечно, оваа пролет ќе спроведе попис на населението и домаќинствата, согласно сите стандарди и пракси на Евростат.
„Добиените податоци ќе послужат како одлична база за градење на политики и мерки во образованието, здравството, социјалната и детска заштита, но и во земјоделството, културата и развојот на регионите и општините“, истакна таа.
ед неа, иницијативата за собирање партиски потписи против Законот за попис покажува дека ВМРО-ДПМНЕ со Христијан Мицкоски е антинародна партија која работи против своите граѓани и против својата држава.
„Секој пратеник од било која пратеничка група, до Собранието може да достави предлог текст на Закон. Отука, јасно е дека овој потег Мицкоски е само за внтрепартиска употреба и исполнување на сопствени хирови“, рече Калеска – Ванчева.
ВМРО-ДПМНЕ на почетокот на месецот поведе иницијатива за собирање 10 илјади потписи за поднесување предлог-закон за поништување на Законот за попис. Претседателот на Собранието Талат Џафери на 9 февруари му ја вратил иницијативата на Мицкоски затоа што во неа не е користено новото уставно име „Република Северна Македонија“ туку старото „Република Македонија“.
Џафери му посочил на Мицкоски дека иницијативата не е доставена до надлежниот орган во Република Северна Македонија, како и дека во земјава не постои Закон за попис на населението, домаќинствата и становите во Република Македонија.
Мицкоски одговори дека ќе почнат со собирање потписи во градовите и селата.
„Никој не победил народ. Ќе ги имаме потписите од пратениците и потписите на народот“, напиша тогаш тој на Фејсбук.
ВМРО-ДПМНЕ, пак, бара пописот да се одложи до април следната година, доколку не може тоа, пописот да биде целосно електронски, а при пописот да се користи и земање на отпечатоци од прстите.
Последниот попис во државата се спроведе во 2002, а обидот за попишување во 2011 пропадна поради политички несогласувања.
