Тачи - Целосно ја преземам одговорноста за изборниот резултат на ДПА
Претседателот на ДПА Мендух Тачи целосно ја презеде одговорност за постигнатиот резултат на партијата на предвремените парламентарни избори.
Одговарајќи на новинарско прашање околу тоа што значи преземање на целосната одговорност за изборниот резултат на ДПА Тачи изјави дека се знае кога претседател на партија ја презема одговорноста.
„Јасно е, но не смеам вечерва да го кажам бидејќи ги чекаме конечните резултати и не сакам ништо да драматизирам. Се знае кога презема претседателот одговорност“, рече Тачи.
Неизвесно до крај, и Груевски и Заев прогласија победа
Три часа по полноќ Државната изборна комисија се уште не излезе со првични резултати. ВМРО-ДПМНЕ и СДСМ прогласија победи и излегоа на улиците во центарот на Скопје да прослават. Граѓанската асоцијација МОСТ, пак, соопшти дека се уште е рано за кој било да прогласи победа. Изненадување има во албанскиот блок, каде е забележано големо намалување на бројот на пратеници.
ДИК – ВМРО-ДПМНЕ освои повеќе гласови, конечни резултати во текот на денов
ВМРО-ДПМНЕ освои околу 15 илјади гласови повеќе од СДСМ на предвремените парламентарни избори, покажуваат првичните резултати, информира три часа по полноќ претседателот на ДИК, Александар Чичаковски.
Тој сепак не излезе со бројка на освоени пратенички мандати за партиите. Најави дека во текот на денов, по обработка на податоците, ДИК ќе излезе со конечни резултати и распоред на пратеничките мандати.
ДИК: ВМРО-ДПМНЕ 452.709, СДСМ 436.469
Според прелиминарните резултати на ДИК од гласањето на предвремените парламентарни избори, по обработени 99,72 отсто од гласовите на 3.514 од вкупно 3.524 избирачки места, ВМРО-ДПМНЕ и Коалицијата за подобра Македонија освоиле 452.709 гласови или 38,06 насто, СДСМ и Коалицијата 436.469 или 36,69 насто, ДУИ 86.812, односно 7,30 проценти, Движењето БЕСА 57.927 или 4,87 проценти, Алијанса за Албанците 35.091 или 2,95 проценти, ДПА 31.017, односно 2,61 насто гласови.
ВМРО за Македонија има 24.449 гласови (2,06%), Левица 12.119 (1,02%), Коалицијата за промени и правда - трет блок 10.083 (0,85), ЛП 3.840 (0,32%), а ПДП 1.142 (0,10%) гласа. Во текот на денешниов ден ДИК ќе излезе со првичните резултати од гласањето на предвремените парламентарни избори и дека тогаш комисијата ќе се произнесе со своја оценка за изборниот процес.