Владиниот состав што го предлага мандатарот Никола Груевски ќе има 26 члена заедно со него, со тоа владата ќе биде и рекордер во регионот по број на членови. Владите на Србија и на Бугарија имаат по 19 члена, Хрватите имаат 21 член, а грчкиот премиер Андонис Самарас работи со 17 луѓе.
Седум министри без ресор и четворица потпреседатели на влада предложи Груевски во новиот владин состав со што всушност според бројноста се доближи до најобемниот кабинет што го имала Македонија, оној на Љубчо Георгиевски.
Претпоставувам дека на секој министер без ресор ќе има по минимум тројца-четворица луѓе околу него.
Едмонд Адеми, политички аналитичар.
Имено, владата на поранешниот премиер која трпеше критики и од странците поради бројноста имаше 27 члена, а оваа сега што ја предлага актуелниот премиер ќе има 26, заедно со него.
Премиерот со странски инвеститори.
Апсолутно е непотребно да имаме толкав владин состав коментира аналитичарот Едмонд Адеми.
„Тоа за мене значи дека е задоволување на лични потреби на коалиционите партнери, пред се на помалите коалициони партнери на ВМРО-ДПМНЕ. Апсолутно не е јасно ни што тие министри без ресор ќе работат, која ќе биде нивната улога како членови на Влада“, оценува Адеми.
За странските партнери игра одредено значење дали на преговарачката маса има министер или пак понизок чиновник од администрацијата.
Сашо Клековски, политички аналитичар.
Груевски пак вчера рече дека новата влада акцентот ќе го ставела на економијата и привлекувањето странски инвестиици и дека затоа имало двајца нови министри без ресор што ќе им помагале на Павлески и Самак.
И аналитичарот Сашо Клековски смета дека министрите без ресор се важни за инвестициите.
„За странските партнери игра одредено значење дали на преговарачката маса има министер или пак понизок чиновник од администрацијата. Мојата претпоставка е дека премиерот сака да го зголеми напорот за што повеќе странски инвестиции“, смета Клековски.
И додека тој оценува дека поради ова нема значително да се проширела владината бирократија бидејќи станувало збор за министри без институции, Адеми има поинакви очекувања.
„Дефинитивно тоа ќе повлече и плус дополнителни буџетски трошоци од нас граѓаните кои го полниме буџетот, вклучително и нови вработувања, претпоставувам дека на секој министер без ресор ќе има по минимум тројца-четворица луѓе околу него“, вели Адеми.
Инаку со овој владин состав Груевски ќе биде и рекордер во регионот. Актуелната влада на Србија има 19 члена, толку има во и кабинетот на бугарската влада, Хрватите имаат двајца повеќе, односно 21 член, а грчкиот премиер Андонис Самарас работи со 17 луѓе.
Родена е 1980 година во Скопје. Со новинарство се занимава од 2004 година кога почнува да работи како постојан дописник на Радио Слободна Европа од Скопје.
Во периодот од 2008 година до почетокот на 2014 година работи прво како новинар во телевизијата Алсат М а потоа во дневниот весник Нова Македонија.
