Се што се случува на вториот круг претседателски и предвремените парламентарни избори - гласањето, евентуалните нерегуларности, реакциите и првичните резултати.
ДПА очекува осум пратеници, не го признава резултатот на ДУИ
Лидерот на ДПА Мендух Тачи вечерва изјави дека очекува осум пратенички мандати од денешните предвремени парламентарни избори и оти е подготвен да преговара за влез во идната влада. Тој истакна дека не ги признава резултатите од изборите на ДУИ.
00:4228.4.2014
Рилкоски - ДИК успешно ги спроведе изборите
ДИК го спроведе успешно овој двоен изборен процес од организационен и технички аспект, рече претседателот на Комисијата, Никола Рилкоски. Тој рече дека ДИК нема да дава официјална оценка и проценка за тоа како поминале изборите, бидејќи ќе чекаат партиите да го искористат правото на вложување приговори.
00:5328.4.2014
Иванов - Победи демократијата
На овие избори победи демократијата, победија граѓаните, победи Македонија, рече кандидатот на ВМРО-ДПМНЕ за претседател, Ѓорге Иванов. Тој изјави дека на Македонија и е потребна конструктивна опозиција, за да ги постигнува целите на граѓаните. Од утре нема победници и поразени, има работа и само работа, рече тој.
01:0828.4.2014
Груевски - Ефективни избори, без посериозни инциденти
Македонија имаше успешни избори, мирен и демократски изборен ден, најголем победник е Македонија. Имавме ефективни избори, без посериозни инциденти и проблеми, можеме да бидеме горди на тоа, рече лидерот на ВМРО-ДПМНЕ, Никола Груевски. Жалам што поради личен интерес, потценувајќи ја волјата на народот, претседателот и раководството на СДСМ одлучија да работат на директна штета на Македонија, во корист на оние кои не и сакаат добро, рече тој.
