Повеќе права за лицата со посебни потреби

Дневниот центар „Порака“ за корисниците над 18 годишна возраст со интелектуална попреченост, во кој за сега се сместени 20-ина лица од сите етнички заедници деновиве беше посетен и од советниците во Општинскиот совет во Куманово. Центарот е отворен со помош и разбирање на локалната самоуправа и градоначалникот Зоран Дамјановски, бидејќи со децентрализацијата овие лица не се опфатени со Законот. Претседателот на Советот Виктор Цветковски, заедно со претставниците на комисиите за социјална и здравствена заштита, за буџетот, за рамноправноста и еднаквоста, како и координаторите на советничките групи имаа можност да се запознаат со начинот на кој функционира центарот.

,,Ова е добра соработка со Дневниот центар „Порака“ и грижа за лицата со интелектуална попреченост. Советот ја продолжи соработката и ја интензивира со поддршка од сите служби на локално ниво."

Со оглед на потребите и проблемите со кои се соочува Центарот, Цветковски вели дека тие ќе се залагаат:

,,Можно е да покренеме иницијатива и за законски промени во делот за социјална грижа."

Благица Димитровска претседател на Здружението и родител на лице корисник на услугите во Дневниот центар вели дека се надева дека овие лица ќе бидат дел од програмата на локалната самоуправа и за идната година.

,,Ја известивме локалната смаоуправа и веројатно и новиот советнички состав ќе прифати да влеземе во програмата за 2010 година што ќе значи и подигање на јавната свест за оваа категорија лица."

Димитровска додава дека корисниците во Центарот се од мултиетнички состав, меѓутоа:

,,Најмалку се занимаваме со политиката, туку се бориме за остварување на правата на најзагрозената категорија граѓани."

Со лицата во Центарот работи стручен тим од социолози, психолози, педагози и дефектолози. Соседите во чија близина е сместен Центарот велат дека е добро што и овие лица се социјализираат, што порано не било случај и дека не и пречат на најблиската околина во која престојуваат пет денови во седмицата.