Николовски уверен во победа на СДСМ на локалните избори
Генералниот секретар на СДСМ Љупчо Николовски изрази увереност дека нивната коалиција ќе забележи победа на изборите. Тој рече дека ќе почнат да го соопштуваат резултатите кога ќе почнат да ги добиваат. Николовски оцени дека имало мирен, достоинствен и европски изборен ден.
До МВР пристигнале 91 пријава, најмногу за агитирање
Изборниот ден мина во мирна и демократска атмосфера, оцени министерот за внатрешни работи Оливер Спасовски, по завршување на гласањето на локалните избори 2021.
„МВР нема регистрирано посериозни нарушувања на изборниот процес. До 19 часот се бележи вкупно намалување за 40 проценти на пријавени настани во споредба со изборите во јуни 2020. Така годинава се пријавени 91 настан, а 151 настан имало лани“, рече Спасовски на прес-конференција пред седиштето на МВР.
Османи - Изборите се успешни, ДУИ победува во три општини уште во првиот круг
Портпаролот на ДУИ, Бујар Османи на првата прес-конференција по завршувањето на гласањето за локалните избори истакна дека првично очекуваат победа во три општини уште во првиот круг. Тој рече дека голема предност неговата партија има и во речиси сите општини каде имаат кандидати.
„Според прелиминарните резултати од досега изброените гласови, уште во првиот круг очекуваме победа на ДУИ во Сарај, Пласница, Липково“, рече Османи.
ЗНМ - Осуда за односот на Даштевски кон новинарите
На денешната попладневна конференција за медиумите организирана од Државната изборна комисија, претседателот на ДИК Александар Даштевски имаше непрофесионален и омаловажувачки однос кон дел од новинарите во делот кога се обидуваше да одговара на новинарските прашања, соопшти Здружението на новинарите на Македонија.