Милошоски, Трамп, Мубарак...

ЕРМЕНИЈА - Поранешниот претседател на Ерменија Серж Саркисијан денеска беше на суд како обвинет за корупција, што според него е политички мотивирано. Судењето на 65 годишниот Саркисијан и четворица негови соработници во судот во Ереван доаѓа речиси две години по падот од функцијата на која беше десет години. Тој е обвинет за координација на шемата преку која се земени речиси еден милион американски долари од владините фондови во 2013 година.

МАКЕДОНИЈА - Владата денеска на седница донесе одлука да ги задолжи сите основни и средни училишта, како и сите универзитети да ги одложат сите предвидени патувања и екскурзии во Италија, како и да организира едукативни часови за превенција од корона вирусот, во соработка со локалната самоуправа и центрите за јавно здравје. На граѓаните на земјата им се препорачува да не патуваат во Италија и во другите земји каде што е регистрирано поголемо присуство на коронавирусот.

МАКЕДОНИЈА - Пратеникот од ВМРО-ДПМНЕ Антонијо Милошоски во Основното јавно обвинителство за гонење организиран криминал и корупција денеска ја однесе и втората аудио снимка на која се слуша гласот на поранешниот премиер Зоран Заев.

САД - Американскиот претседател Доналд Трамп ќе побара 2,5 милијарди долари за борба против епидемијата на коронавирусот откако бројот на потврдени случаи се зголеми што предизвика потреси на финансиските пазари од Соединетите Американски Држави до Италија и Германија.

АЛБАНИЈА - Албанскиот претседател Илир Мета, зборувајќи за, како што го нарече, државен удар, обвини меѓународни претставнци дека се вмешани во него, додавајќи дека амбасадорите излегле од нивниот дипломатски статус во Албанија.

ХРВАТСКА - Хрватска го потврди првиот случај на коронавирус на своја територија. Премиерот Андреј Пленковиќ денеска рече дека пациентот е хоспитализиран во болница во Загреб.

ГЕРМАНИЈА - Германските власти соопштија дека 52 лица се повредени откако човек со возило влета во насобраните на карневалот во западната држава Хесе. Полицијата сооопшти и дека меѓу повредените во вчерашниот инцидент во градот Фолкмарзен има 18 деца.

ТУРЦИЈА - Турската полиција го уапси капетанот на авионот на компанијата Пегазус ерлајнс, кој на почетокот од месецов излета од писта на аеродромот Сабиха Гокчен во Истанбул, при што загинаа три лица.

ЕГИПЕТ - Поранешниот претседател на Египет Хосни Мубарак починал во болница во Каиро на 91 година, јави денеска државната египетска телевизија. Мубарак беше на власт речиси три декади, а беше симнат од војската во февруари 2011 година по протестите кои тогаш се случуваа низ целата земја.