Полициски службеници од СВР Куманово лишија од слобода 17-годишен малолетник од Куманово, постапувајќи по добиена пријава дека на 29 ноември во 09.05 часот е откорната табла од канцеларијата на Конзулатот на Република Србија во земјава, лоциран во Куманово, соопшти МВР.

Малолетникот е приведен во полициска станица и по документирање на случајот СВР Куманово ќе поднесе кривична пријава по член 319 од КЗ до кумановското обвинителство.

Амбасадата на Република Србија во Република Северна Македонија вчера преку соопштение најостро го осуди, како што го нарече вандалски чин, кога од фасадата на зградата на Конзулатот на Република Србија во Куманово, младо машко лице обвиено со албанско знаме, насилно ја отстранило таблата со грбот на Република Србија и натписот „Конзулат на Република Србија во Куманово - Почесен конзул“, напишан на српски и македонски јазик.

Основното јавно обвинителство Скопје информира дека повела истрага против 33 годишен македонски државјанин за убиство во Ханиоти кое се случило минатата година.

Како што посочуваат од Јавното обвинителство, осомничениот 33-годишник на 15 јули 2023 година, во Ханиоти, Република Грција, заедно со уште едно засега непознато лице, со умисла го лишиле од живот сега покојниот Орхан Бајрами, а ги довеле во опасност и животите на уште четири лица.

По претходен договор, осомничениот и неговиот соизвршител маскирани пристигнале во туристичкиот комплекс каде била сместена жртвата и се приближиле до отворената задна балконска врата.

„Осомничениот од огнено оружје – пиштол „Црвена застава“ со калибар 7,65 мм со пригушувач испукал 11 куршуми, а неговиот соучесник со пиштол од ист калибар уште 8 куршуми во правец кон оштетените. Од куршумите, три завршиле во телото на сега починатиот, нанесувајќи му смртоносни повреди. Грчките истражни органи имаа издадено налог за апсење на осомничениот, како и Европски налог за апсење и меѓународна потерница поради сомненија за кривични дела – намерно убиство со соучесништво и обид за сериско и соучесничко убиство на територијата на Република Грција“, велат од Обвинителство.

Видете и ова:

Крвава војна во скопското подземје

Како што наведуваат од ОЈО, со оглед на тоа што станува збор за македонски државјанин за кого не постои можност за екстрадиција, врз основа на инструментите за меѓународна правна соработка, грчките власти го отстапиле кривичното гонење на Основното јавно обвинителство Скопје.

Јавниот обвинител до Основниот кривичен суд во Скопје доставил предлог за определување мерка притвор за осомничениот.

Сириските бунтовници, противници на претседателот Башар ал-Асад, во петокот објавија дека стигнале до центарот на Алепо, најнаселен сириски град на северот од земјата, по ненадејниот пробив низ територијата под контрола на владата и речиси една деценија откако беа протерани од градот.

Бунтовничките групи, предводени од исламистичката Хајат Тахрир ал-Шам, минатата недела започнаа напади врз десетици места во северната провинција Алепо, контролирани од владата на Асад поддржана од Иран и Русија.

Бунтовниците брзо напредуваа низ територијата на сириската влада, а доцна во петокот објавија дека се наоѓаат во неколку населби на Алепо.

Сириската опсерваторија за човекови права објави дека бунтовниците и нивните сојузници во петокот го освоиле и стратешкиот град Саракиб во северозападна Сирија.

Саракиб се наоѓа во провинцијата Идлиб, а неговото заземање е важно за бунтовниците и нивните сојузници бидејќи ќе им помогне „да го спречат напредувањето на режимот кон Алепо“, пишува Франс прес.

Башар ал Асад ја врати контролата над Алепо на крајот на 2016 година, со помош на Русија, Иран и регионалните шиитски паравојски.

Тогаш бунтовниците се согласија да се повлечат по долга опсада.

Мустафа Абдул Џабер, командант на бунтовниците од бригадата Џаиш ал-Иза, рече дека нивните сили напредувале брзо поради недоволната поддршка од проиранските елементи во областа.

Видете и ова:

Ирански функционер убиен во наводни израелски воздушни напади во Сирија

Сојузниците на Иран во регионот претрпеа серија удари од Израел, откако офанзивата во Појасот Газа се претвори во поширока војна на Блискиот Исток, пишува Ројтерс.

Извори од опозицијата изјавија за Ројтерс дека Турција дала зелено светло за офанзивата на бунтовниците, но портпаролот на турското Министерство за надворешни работи рече дека Анкара сака да избегне поголема нестабилност во регионот и предупреди дека неодамнешните напади ги поткопуваат договорите за деескалација.

Минатонеделните напади се најголеми од март 2020 година, по што Русија и Турција се договорија за деескалација.

Сириската државна телевизија ги отфрли тврдењата дека бунтовниците стигнале до градот и објави дека Русија и дава воздушна поддршка на сириската армија.

Сириската армија извести дека продолжува да се спротивставува на нападот и дека им нанела тешки удари на бунтовниците во околината на Алепо и Идлиб.

Руски и сириски авиони ја бомбардираа областа долж границата со Турција во четвртокот, обидувајќи се да го запрат напредувањето на бунтовниците.

Портпаролот на Кремљ, Дмитриј Песков, изјави дека Москва го смета нападот за кршење на суверенитетот на Сирија и нагласи дека Русија „сака сириските власти да ја вратат контролата и уставниот поредок“ во областа што е можно поскоро.

Запрашан за непотврдените извештаи од апликацијата Телеграм дека Асад отпатува во Москва на разговори со рускиот претседател Владимир Путин, Песков рече дека „нема што да каже“ на оваа тема.

На Сирија и е ветена дополнителна воена помош од Русија во борбата против бунтовниците кои се противат на претседателот Асад во близина на Алепо, изјавија два воени извори за Ројтерс.

Дамаск очекува оружјето да почне да пристигнува во руската база Хмејмим во близина на крајбрежниот град Латакија во следните 72 часа, додаваат изворите.

Најниска темпратура утрово е измерена во на Попова Шапка - 5 степени. Во Маврови Анови се измерени -3, во Крушево -2, во Берово -1, во Охрид, Претор и Прилеп 0 степени.

Во Тетово, Битола, Дебар и Крива Паланка 1 степен, во Струмица и Виница 2, во Скопје-Зајчев Рид, Куманово и Штип 3, во Скопје-Петровец, Велес, Демир Капија и Кавадарци 4 и во Гевгелија 5 степени.

Најмногу снег има во Берово 22 сантиметри, во Маврови Анови и на Попова Шапка 10, во Крушево седум и во Претор еден сантиметар. Најмногу дожд наврнало во Струмица, во Берово и во Крушево.

Времето денеска ќе биде претежно облачно и постудено со повремени врнежи, кои во западните и јужните делови ќе бидат поројни и обилни..

На планините врнежите ќе бидат од снег од 40 до 50 см, на повисоките места од 10 до 30 см, а во некои пониски места од дожд и снег и ќе се формира помала снежна покривка. Во југоисточните делови ќе бидат само од дожд. Ќе дува умерен, а на планините силен северен ветер. Максималната температура ќе достигне од 2 до 6 степени.

Во Скопје времето ќе биде облачно со повремени врнежи од дожд и снег, а на околните планини од снег. Ќе дува умерен ветер од северен правец кој краткотрајно ќе засилува. Максималната температура ќе достигне до 5 степени.

Мнозинството граѓани на Северна Македонија или 56 отсто имаат доверба во Европската Унија, покажуваат резултатите од есенското истражување на Евробарометар за 2024 година.

Исто ниво на доверба кон ЕУ како македонските државјани, изразуваат и граѓаните на Босна и Херцеговина. Меѓу останатите земји кандидати за членство, довербата кон ЕУ е најголема во Албанија со 81 отсто, пред Црна Гора со 75, Косово со 70 и Грузија со 58 проценти.

Пониска доверба кон ЕУ од македонските државјани изразуваат Молдавците и тоа од 52 отсто, што сепак укажува дека мнозинството граѓани на Молдавија, како и на останатите споменати земји кандидати веруваат во Унијата.

Видете и ова:

Извештај со 120 препораки за европскиот пат на Северна Македонија

Пониска доверба кон ЕУ од 50 отсто имаат државјаните на Турција и тоа од 42 проценти и граѓаните на Србија од 38 отсто. Сепак, и ова податоци претставуваат пораст на довербата во ЕУ за четири проценти во Турција и за два отсто во Србија споредено со овогодишното пролетно истражување.

Доверба кон ЕУ од 38 проценти изразуваат и жителите на Велика Британија, што претставува пораст за шест отсто.

Кога станува збор, пак, за граѓаните на ЕУ, мнозинството од нив или 51 отсто веруваат во Унијата, што претставува највисоко измерено ниво на доверба на Европејците кон блокот во последните 17 години.

Според овие податоци, на рекордно највисоко ниво е и поддршката на Европејците за еврото, тие имаат пооптимистички поглед кон иднината и би сакале да видат посилна и понезависна ЕУ, особено во услови на актуелните глобални предизвици. Најголема поддршка кон ЕУ или 59 отсто од испитаниците искажале младите Европејци на возраст од 15 до 24 години.

Иста поддршка како кон ЕУ од 51 отсто, Европејците изразуваат и кон Европската комисија, со што таа е на највисоко ниво од 2007 година.

Речиси три четвртини од испитаниците или 74 проценти од државјаните на земјите членки на ЕУ изјавиле велат дека се чувствуваат како граѓани на ЕУ, што претставува највисоко ниво во повеќе од две децении, додека 61 отсто од Европејците се оптимисти околу иднината на ЕУ.

Речиси седум од десет испитаници или 69 отсто се согласуваат дека ЕУ има доволно моќ и инструменти за да ги брани економските интереси на Европа во глобалната економија, а ист процент се согласуваат дека Европската Унија е место на стабилност во денешниот проблематичен свет.

Една третина од Европејците или 33 отсто сметаат дека главен приоритет на дејствувањето на ЕУ на среден рок треба да бидат безбедноста и одбраната, 29 проценти тоа треба да биде миграцијата, за по 28 отсто економијата и животната средина, а за 27 проценти здравјето. Во исто време, 44 отсто од европските граѓани сметаат дека обезбедувањето мир и стабилност ќе има највисоко позитивно влијание врз нивниот живот на краток рок, следено со обезбедување на храна, здравствена заштита и индустриски резерви и со справувањето со миграцијата, со по 27 проценти.

Кога станува збор за специфични области за дејствување на ЕУ во областа на заштитата на животната средина, 38 отсто од Европејците веруваат дека приоритет треба да се даде на користењето на енергија од обновливите извори, 31 проценти на инвестициите во одржливо земјоделство, а по 28 отсто во изградба на енергетска инфраструктура и инвестирање во чиста технологија.

Видете и ова:

Советот на Европската унија одобри построги стандарди за квалитет на воздухот

Истражувањето регистрира и досега најголемата поддршка за заедничката европска валута, која на ниво на цела ЕУ изнесува 74 отсто и само во Еврозоната 81 процент. Кога станува збор за перцепцијата за состојбата на европската економија, 48 отсто од Европејците сметаат дека таа е добра, додека 43 проценти оценуваат дека е лоша.

Дури 76 отсто од европските испитаници сметаат дека руската инвазија врз Украина претставува закана за безбедноста на ЕУ.

Од таму, 87 проценти од анкетираните се согласуваат со обезбедување хуманитарна поддршка на луѓето погодени од војната во Украина, 71 отсто ги поддржуваат економски санкции кон руската влада, компании и поединци, а 68 проценти се согласуваат со обезбедување финансиска поддршка за Киев. Околу 60 отсто од Европејците одобруваат ЕУ да и додели кандидатски статус на Украина, а 58 проценти се согласуваат Унијата да го финансира купувањето и снабдувањето со воена опрема за земјата.

Ова есенско истражување на Евробарометар е спроведено помеѓу 10 октомври и 5 ноември во 27-те земји членки на ЕУ, во девет од земјите кандидати и потенцијални кандидати за членство во Унијата (сите освен Украина), како и во Велика Британија. Само во ЕУ со анкетата биле опфатени 26.525 граѓани.

Косовскиот совет за безбедност во саботата презеде итни мерки за ублажување на последиците и зачувување на безбедноста на критичната инфраструктура на земјата по нападот во кој беше оштетен каналот Ибар-Лепенец, соопшти Владата.

Советот одржа вонредна седница со која претседаваше премиерот Албин Курти, само неколку часа по експлозијата во петокот вечерта, предизвикана значителна штета на овој канал, загрозувајќи го снабдувањето со вода и електрична енергија.

Косовската полиција врши претрес на некои куќи на север, потврди за Радио Слободна Европа заменик-директорот за северен регион, Ветон Елшани, без да даде повеќе детали.

Екипата на Радио Слободна Европа (РСЕ) од терен известува дека од каналот се уште истекува вода, иако во текот на ноќта бил поставен земјен насип. Во моментов на терен нема полиција, присутни се само членови на мисијата на НАТО на Косово (КФОР).

Жителите кои живеат во близина на каналот велат дека водоснабдувањето не им е загрозено бидејќи користат изворска вода и не зависат од каналот Ибар-Лепенец.

Владата на Косово соопшти дека се преземени конкретни чекори за враќање на состојбата во нормала и ги уверува граѓаните дека во најбрз можен рок ќе се обнови снабдувањето со вода и електрична енергија.

Советот за безбедност одобри дополнителни мерки за заштита на критичните објекти како што се мостови, трафостаници, антени, езера, канали итн.

Министерката за економија во Владата на Косово, Артане Ризваноли, во саботата изјави дека по нападот на каналот Ибар-Лепенец е обезбедено редовно снабдување со електрична енергија и парно за граѓаните на Приштина.

Експлозијата што се случи во петокот вечерта предизвика значителна штета на каналот Ибар-Лепенец во селото Вараге на територијата на општина Зубин Поток, што го загрози снабдувањето со вода и струја на Косово.

Од хидросистемот Ибар-Лепенец на езерото Газиводе во Зубин Поток, со вода за пиење се снабдува северот на Косово, како и Приштина и неговата околина. Водата за термоелектраните во Обилиќ се снабдува од Газиводе и се користи за ладење на електраните Косово А и Косово Б, а покрај тоа, водата од акумулацијата езерото Газиводе се користи и за наводнување на земјоделските површини.

Компанијата Ибар-Лепенец постави шест привремени цевки со доволен капацитет за да обезбеди вода за ладење на термоелектраната Косово Б околу 02:00 часот по полноќ, во рекордно време. На овој начин очекуваме снабдувањето со електрична енергија да биде стабилно“, напиша Ријваноли. на Фејсбук.

Таа додаде дека по вонредната седница на Косовскиот совет за безбедност е донесена одлука властите да се координираат со Енергетската корпорација на Албанија, со цел да се обезбеди дополнителна енергија и да се избегнат можните ограничувања.

Нема жртви во експлозијата кај каналот Ибар-Лепенец на територијата на општина Зубин Поток.

Косовскиот премиер Курти ја обвини Србија дека стои зад експлозијата, а нападот го осудија претставници на западните земји во Приштина, како и Српска листа, најголемата партија на Србите во Косово, поддржана од сопствената партија во Србија.

Официјален Белград се уште не се огласил.

Министерката Ризваноли изјави дека „овој терористички чин“ влијаел и на водоснабдувањето.

Видете и ова:

Експлозија во Зубин Поток оштети канал за вода, Курти ја обвини Србија

„Водоснабдувањето во Приштина ќе се компензира со вода од Бадовачкото и Батлавското езеро, водоснабдувањето во Косово Поље, Глоговац и регионот на Митровица ќе биде обезбедено со цистерни“, рече таа.

Нападот на каналот Ибар-Лепенец е трет во последните 72 часа на северот на Косово, каде живее мнозинско српско население.

Откако беа фрлени експлозивни направи во близина на полициската станица и општинската зграда во Звечан, косовската полиција ги зголеми безбедносните мерки, односно присуството на теренот, вклучително и на север.

Грузиската полиција употреби водени топови за да ги растера илјадниците демонстранти кои втор ден по ред се собираат во близина на парламентот во Тбилиси за да протестираат против одлуката на владата да ги прекине пристапните преговори со Европската унија.

Полицијата употребила и солзавец за да ги разбие собирите во доцните часови на 29 ноември.

Грузиската претседателка Саломе Зурабишвили, жесток критичар на владејачката партија „Грузиски сон“, ги осуди „бруталните и непропорционални напади врз грузискиот народ и медиумите“, споредувајќи ја репресијата со „репресија од руски стил“.

„Овие дејствија нема да бидат простени! Одговорните за употребата на сила треба да сносат одговорност“, напиша таа на социјалната платформа Х порано позната како Твитер.

Демонстрантите излегоа на улиците втор ден по ред откако премиерот Иракли Кобахидзе рече дека неговата влада ги прекинува преговорите со ЕУ и дека ќе ги отфрли буџетските грантови од Брисел „до крајот на 2028 година“.

Видете и ова:

Грузиски дипломати со остра критика до Владата, откако безбедносни сили тепаа демонстранти и новинари

Повеќе од сто грузиски дипломати остро го критикуваа владиното запирање на преговорите за членство во ЕУ, откако безбедносните сили насилно ги растераа демонстрантите и новинарите на протестот на 28 ноември во Тбилиси поради потегот.

Повеќе од 30 луѓе беа хоспитализирани рано на 29 ноември, откако полицијата употреби солзавец, водени топови и претепа некои од илјадниците собрани за да го истурат својот гнев поради најавата на Кобахиџе.

Грузија е во политички превирања по парламентарните избори во октомври, на кои партијата „Грузискиот сон“ обезбеди 54 отсто од гласовите, при што опозицијата и западните влади тврдат дека гласањето било нарушено со прекршувања и руско влијание.

На почетокот на 28 ноември, полицијата тргна да ги расчистува мирните демонстранти, при што маскираната полиција пукаше со гумени куршуми и брутално ги претепа демонстрантите и новинарите.

Говорејќи во седиштето на Грузискиот сон, Кобахиџе рече дека Тбилиси ги прекинува пристапните преговори, а истовремено ги отфрла сите буџетски грантови од ЕУ до 2028 година.

„Нема да влеземе во Европската унија со молење и стоење на една нога, туку на достоинствен начин со здрав демократски систем и силна економија“, им рече премиерот на новинарите без никакви прашања.

Грузија доби статус кандидат за ЕУ во декември 2023 година, но односите со Брисел се влошија во последниве месеци, почнувајќи со усвојувањето на контроверзниот закон за „странски агенти“ за кој критичарите велат дека се заканува јавно да дискредитира илјадници медиуми и граѓански групи.

Српските пратениците од партијата Социјалистичко движење, чиј основач е прорускиот потпретседател на Владата на Србија Александар Вулин, до Собранието поднесоа предлог-закон за посебен регистар на агенти на странско влијание.

Предлог-законот беше поднесен на 29 ноември од пратениците Ѓорѓе Комленски и Бојан Торбица, објави белградскиот весник „Данас“.

Законот за странски агенти постои во Русија и, според критичарите, служи за задушување на критиките на владата и ограничување на работата на активистите за човекови права и независните медиуми.

Во предлог-законот на Социјалистичкото движење, кој се уште не е објавен на веб-страницата на српското Собрание, за „агенти“ се сметаат сите здруженија и непрофитни организации кои во најголем дел се финансирани или на друг начин помагани од странски субјекти.

Под странски субјекти се подразбираат други држави, нивните тела, меѓународни и странски организации, странски државјани или регистрирани невладини организации финансирани од странство.

Видете и ова:

Две српски компании во предлогот за нов пакет санкции на ЕУ за Русија

Непрофитна организација која се занимава со политичка активност, како и други активности поврзани со политичка активност насочена кон загрозување на демократијата, нарушување на интегритетот на Србија, кршење на слободите и правата загарантирани со Уставот и поттикнување национална, расна или верска омраза, се нарекува и „агент на странско влијание и фанатизам“.

Исто така, се предвидува дека секое појавување на претставник на „агенти на странско влијание“ мора да биде означено дека организацијата е регистрирана во Регистарот на агенти од странско влијание што го води Министерството за правда.

Предвидени се казни во случај на непочитување на овој закон, како забрана за работа и кривична пријава против одговорните лица, како и парични казни.
Казните се движат од 5.000 динари (околу 42 евра) до 2.000.000 динари (околу 17.000 евра).

Вицепремиерот на Србија, Александар Вулин, на 29 ноември за ТВ Пинк изјави дека Социјалистичкото движење наскоро ќе поднесе предлог-закон за финансирање на невладините организации во Србија, „по примерот на Соединетите Држави, според кои странското финансирање на невладини организации е забрането“, објави новинската агенција Срна.

Американскиот Закон за регистрација на странски агенти (ФАРА) од 1938 година се занимава со различни прашања од оние што ја регулираат работата на невладините, непрофитни организации.

Според овој закон, „странски агенти“ се поединци кои дејствуваат според директивите на странски земји, се занимаваат со политички активности, собираат пари или дејствуваат по наредба на претпоставените, во контакт со американските власти.

Законот ФАРА е создаден во 1938 година со цел да се потисне нацистичката, а подоцна и болшевичката пропаганда. Со последователните ревизии, законот е насочен кон перење пари, корупција, тероризам и заобиколување на санкциите.

Експлозија што се случи вечерта на 29 ноември во Зубин Поток на северот на Косово го оштети каналот за вода на јавното препријатие за вода „Ибер-Лепенци“.

Косовскиот премиер Албин Курти ја обвини Србија дека стои зад експлозијата, а нападот го осудија претставниците на западните земји во Приштина, како и Српска листа, најголемата партија на Србите на Косово поддржана од властите во Србија.

Курти рече дека станува збор за „криминален напад од терористи“, кои, како што рече, планирале да оштетат важна инфраструктура.

Тој ги повика граѓаните да останат смирени и да ги следат официјалните соопштенија на институциите кои „се ангажираат за менаџирање на состојбите и санирање на штетите“.

Курти изјави дека поради оштетувањето на каналот Ибар-Лепенац, многу делови на Косово би можеле да останат без струја во утринските часови на 30 ноември, а неколку градови, меѓу кои и дел од Приштина, може да останат без вода.

Нема жртви во експлозијата во селото Вараге на територијата на општина Зубин Поток.

Министерот за внатрешни работи Џелал Свечла, кој излезе на местото на настанот, изјави дека пред 19 часот се слушнала експлозија и дека е оштетен дел од Ибер-Лепенци, кој се смета за критична инфраструктура.

Свечла рече дека се мобилизирани институциите за да се санираат штетите и граѓаните да не трпат последици.

„Императивна должност на безбедносните институции е да ги истражат терористите кои го извршија овој терористички чин и да ги изведат пред лицето на правдата“, нагласи тој.

Видете и ова:

Експлозивна направа била фрлена врз зградата на општина Звечан на северот на Косово

Косовската полиција, рече тој, ја добила информацијата за експлозијата нешто пред 19 часот и веднаш пристигнала на местото на настанот.

Јавното претпријатие за водовод „Ибер-Лепенци“ е акционерско друштво со седиште во Приштина и е мултифункционално претпријатие кое ја снабдува индустријата, водоводите и земјоделството со сирова вода, како и произведува електрична енергија од хидроцентралата Ујман.

Регионалното водоводно претпријатие Митровица соопшти дека е прекинато снабдувањето со вода за пиење поради оштетување на каналот.

Главната српска партија во Косово,Српска листа, која ја има поддршката од Белград, рече дека остро го осудува инцидентот со кој е предизвиката штета штетата на каналот за вода во селото Варага.

„Сакаме јасно да ставиме до знаење дека овој чин е апсолутно против интересите на српскиот народ и бараме од КФОР и ЕУЛЕКС итно да го истражат овој случај“, соопшти оваа партија преку објава на социјалните мрежи.

Во соопштението е наведено дека оштетувањето на каналот за вода, освен што го загрозува водоснабдувањето на граѓаните, „предизвикало загриженост и кај Србите на северот на Косово“.

Врз основа на владините документи, од системот Ибер-Лепенци во Ујман до Зубин Поток, северот на Косово се снабдува со вода за пиење, но и Приштина и неговата околина. Со овој хидросистем се снабдуваат со вода и термоелектраните во Обилиќ, кои се користат за ладење на термоелектраните „Косово-А“ и „Косово- Б“, а покрај тоа, водата од акумулацијата Ујман се користи и за наводнување на земјоделските површини. Самиот канал Ибер-Лепенци има должина од 49 километри, од езерото Ујман до езерото Бадоц кај Приштина.

Вкупно седум општини, јужно и северно од реката Ибр, се снабдуваат со вода од Ујман, и тоа Јужна и Северна Митровица, Звечан, Вуштри, Глогоци, Скендерај и дел од Приштина.

Освен нив, од снабдувањето со вода од ова вештачко езеро целосно зависат и термоелектраните „Косова А и Б“, „Трепча“ и „Фероникел“.

Исто така, во хидроцентралата Валач се произведуваат 32 мегавати (MW) електрична енергија.

Видете и ова:

Фрлени рачни бомби во полициската станица во Звечан

Експлозијата во Зубин Поток се случи неколку часа откако косовската полиција соопшти дека ги засилила безбедносните мерки на ниво на земја, вклучително и во северниот дел населен со мнозинство Срби, каде во последните денови се случија неколку инциденти со експлозивни направи.

Полицијата соопшти дека ќе ги засили активностите, ќе го зголеми присуството на терен, „вршење повеќе патроли во најкритичните области, повеќе пунктови и зголемена соработка со граѓаните“.

На северот на Косово, населен со мнозинство Срби, последните денови имаше инциденти со експлозивни направи.

На 27 ноември властите соопштија дека полициската станица во Звечан била нападната со две рачни бомби.

Во меѓувреме, на 29 ноември, полицијата соопшти дека врз зградата на општина Звечан била фрлена експлозивна направа за која се сомнева дека е рачна бомба.

Украина соопшти дека нападнала складиште за нафта и радар за противвоздушна одбрана во Русија рано на 29 ноември, во услови на ескалација на нападите и од Москва и од Киев пред инагурацијата на новоизбраниот претседател на САД, Доналд Трамп во Белата куќа.

Украинскиот воен Генералштаб соопшти дека нападот врз магацинот за нафта Атлас во руската област Ростов предизвикал пожар во објектот, кој претходно беше погоден од сличен напад на почетокот на оваа година.

„Атлас е дел од рускиот воено-индустриски комплекс, кој обезбедува снабдување со нафтени деривати за армијата на Руската Федерација“, се вели во соопштението објавено на социјалните мрежи.

Видете и ова:

Рускиот министер за одбрана Белоусов во посета на Северна Кореја

Се додава дека радарската станица во која се наоѓа рускиот противвоздушен ракетен систем Бук-М3 е уништена во одделен напад во област контролирана од Русија во југоисточниот регион на Украина Запорожје.

Вршителот на должност гувернер на Ростовската област,Јуриј Сљусар, изјави дека има пожар во „индустриски комплекс“ во областа каде што се наоѓа рафинеријата, велејќи дека повеќе од 100 одговорни лица се борат да го изгаснат пожарот.

Во изминатите неколку месеци, Русија ги гаѓаше украинските градови со сè потешки напади со беспилотни летала, проектили и бомби, предизвикувајќи жртви и оштетувајќи ја енергетската инфраструктура со почетокот на студената сезона.

Украина започна неколку контранапади откако администрацијата на американскиот претседател Џо Бајден, главниот странски поддржувач на Украина во нејзината битка против целосната инвазија на Русија, и европските сојузници на Киев одобрија употреба на ракети со долг дострел против цели во Русија.

За време на претседателската кампања во 2024 година, Трамп беше критички настроен кон Бајден затоа што истури милијарди долари во Украина за да и помогне во борбата.

Трамп, исто така, рече дека може да ја заврши војната во рок од 24 часа по повторното заземање на Белата куќа, изјава што се толкува во јавноста како да значи дека Украина ќе мора да ја предаде територијата што Русија сега ја окупира.

Се чини дека таа можност ги поттикна и Москва и Киев да се обидат да ги зацврстат географските позиции пред Трамп да ја преземе функцијата во јануари.