Вести
Ален - САД ги охрабруваат лидерите на Северна Македонија да го почитуваат Преспанскиот договор
Потсекретарката за јавна дипломатија и односи со јавноста во американскиот Стејт департмент, Елизабет Ален, во разговор за СДК вели дека САД го поддржуваат Преспанскиот договор со Грција и дека се разочарани што претседателката Гордана Сиљановска-Давкова не го користеше уставното име Северна Македонија при инаугурацијата.
Потсекретарката Ален, која викендов беше во посета на Скопје, не сака да прејудицира што би се случило ако новата влада реши да не го почитува Преспанскиот договор.
Ален денеска со посетата на Северна Македонија ја заврши турнејата низ земјите на Западен Балкан, при што ги посети Босна и Херцеговина, Србија и Косово.
На прашањето на СДК што би се случило ако новата македонска влада реши да не го почитува Преспанскиот договор со Грција, дали и што САД ќе променат во поддршката за Македонија, Ален изјави:
„Се разбира, ние го поддржуваме Преспанскиот договор и бевме разочарани кога видовме дека претседателката не го користи целосното и формално име Северна Македонија. Ќе следиме да видиме што прави владата. Во постојан дијалог сме со владата која е во тек на формирање. И затоа, тука не би прејудицирала никакви последици, но, секако, би се надевале и охрабруваме дека лидерите на Северна Македонија ќе се придржуваат до меѓународните договори“.
Претседателката Сиљановска-Давкова не кажа Северна Македонија туку само Македонија при заклетвата на инаугурацијата во Собранието на 12 мај. Следниот ден, во соопштение од нејзиниот кабинет кажаа дека таа свечената заклетва ја потпишала со уставното име на земјата, дека претседателката ќе се придржува до официјалната примена на уставното име, но дека „има право да го употребува името Македонија во своите јавни настапи, како чин на лично право на самоопределување и самоидентификација“.
Претходно и од амбасадата на САД во земјава порачаа дека остануваат цврсто посветени на Договорот од Преспа и на евроатлантските интеграции на Северна Македонија. од амбасадата рекоа дека откако ќе се формира нова влада и ќе се избере премиер, ќе продолжат да ја зајакнуваат важноста на почитувањето на меѓународните договори и придобивките од напредокот на државата со полноправно членство во Европската Унија.
Пораки и потсетувања за почитување на договорот од Преспа стигнаа и од Европската Унија. Од грчка страна, пак, не стивнуваат острите реакции и предупредувања дека Северна Македонија нема да има напредок во евроинтеграциите ако новата влада не го користи уставното име на државата.
види ги сите денешни вести
Турција депортира 325 авганистански мигранти
Турските власти депортираа 325 авганистански мигранти во последните два дена, соопшти на 10 ноември Министерството за бегалци и репатријации на Талибанците.
Во последниве месеци, Турција ги интензивираше рациите за приведување и протерување авганистански мигранти, повеќето од нив без документи.
Околу 600 авганистански државјани беа приведени во полициските рации во Истанбул во септември и беа префрлени во притворните центри.
Шпанците бараат оставки поради бавниот одговор на владата на поплавите
Десетици илјади Шпанци излегоа на протестен марш на 9 ноември низ Валенсија, на истокот на земјата. Тие бараат оставка од регионалниот претседател кој го сметаат за одговорен за задоцнетиот одговор на минатонеделните поплави во кои загинаа повеќе од 200 луѓе, а многу други се водат како исчезнати.
Група демонстранти се судри со специјалната полиција пред градското собрание во Валенсија, каде демонстрантите го започнаа својот марш до седиштето на регионалната влада. Полицијата употреби палки за да ги притисне назад.
Регионалниот лидер Карлос Мазон е под огромен притисок откако неговата администрација не испрати навреме предупредувања до мобилните телефони на граѓаните, а тие пристигнаа само неколку часа по почетокот на поплавите, ноќта на 29 октомври.
Многу демонстранти држеа транспаренти на кои беа испишани барања за оставка на Мазон, додека други носеа транспаренти на кои беше напишано обвинувањето дека тој е виновен за нивнта смрт.
По пристигнувањето во седиштето на регионалната влада, некои демонстранти фрлаа кал врз зградата и оставија калливи отпечатоци од дланка на фасадата.
Претходно во саботата, Мазон изјави за еден регионален медиум дека „ќе дојде време кога официјалните лица ќе одговараат“, но дека сега е „време да продолжиме да ги чистиме нашите улици, да им помогнеме на луѓето, да се обновиме“.
Тој рече дека го „почитува“ демонстративниот марш.
Мазон, од конзервативната Народна партија, исто така е на удар поради, како што вели, бавниот и хаотичен одговор на природната катастрофа.
Илјадници волонтери беа први кои искочија на терен, во многу од најтешко погодените предградија на Валенсија.
На официјалните лица им требаа неколку дена да ги мобилизираат полицијата и армијата, што регионалните власти го побараа од националните власти.
Во Шпанија, регионалните влади се задолжени за цивилната заштита и можат да бараат дополнителни ресурси од федералната влада во Мадрид, предводена од социјалистите.
Мазон го бранеше своето справување со кризата, велејќи дека размерите на катастрофата не може да се предвидат и дека неговата администрација не добила доволно предупредување од централните власти.
Талибанците првпат ќе присуствуваат на конференцијата на ОН за климатски промени
Талибанците ќе присуствуваат на климатска конференција на ОН за прв пат од нивното преземање на власта во Авганистан во 2021 година, соопшти националната агенција за животна средина на земјата на 10 ноември.
Конференцијата, позната како КОП 29, започнува на 11 ноември во Азербејџан и е една од најважните мултилатералните разговори ќе ги вклучат талибанците, кои немаат официјално меѓународно признавање како легитимни владетели на Авганистан.
Националната агенција за заштита на животната средина напиша на социјалната платформа X дека техничка делегација отишла во Баку да учествува.
Шефот на агенцијата, Матиул Хак Калис рече дека делегацијата ќе ја искористи конференцијата за да ја зајакне соработката со меѓународната заедница за заштита на животната средина и климатските промени, да ги сподели потребите на Авганистан во однос на пристапот до постоечките финансиски механизми поврзани со климатските промени и да разговара за напорите за адаптација и ублажување.
Либан:Најмалку 23 загинати при израелски напад северно од Бејрут
Либанското Министерство за здравство соопшти дека во израелски напад на 10 ноември загинале 20 лица, меѓу кои три деца во селото Алмат, северно од главниот град Бејрут.
„Во нападот на израелскиот непријател врз Алмат во областа Џбеил загинаа 20 лица, меѓу кои три деца, а шест беа повредени, според ажурираниот биланс“, се вели во соопштението на Министерството.
Претходно на 10 ноември, либанската државна новинска агенција објави дека израелски воздушен напад бил насочен кон куќа во Аламат, што резултирало со голем број на жртви.
На друго место во Либан, израелски воздушен напад беше насочен кон здравствен центар во јужниот град Адлун, при што загинаа тројца болничари, соопшти Министерството за здравство.
Израелската војска соопшти дека нејзините воздушни сили во последните денови целеле и елиминирале десетици борци на Хезболах, организација која САД ја сметаат за терористичка група, иако ЕУ го стави на црната листа само вооружено крило на Хезболах, не и политичката партија.
Скопје втор ден по ред во првите десет најзагадени градови во светот
Скопје втор ден по ред е рангиран на седмото место, односно влегува во групата од десетте најзагадени градови во светот. Ова го покажува ранг листата на швајцарската компанија за мерење на квалитетот на воздухот „Ај кју eр“ (IQAir).
Според овие податоци Скопје се наоѓа на седмото место на најзагадени градови со ндексот на загаденост е 139, веднаш зад Лахор во Пакистан, Њу Делхи во Индија, Багдад во Ирак, Техеран во Иран и Ташкент во Узбекистан.
Од европските градови во листата на топ десет најзагени градови се најдоа и Будимпешта, Милано и Виена, додека, пак, останатите два града се Мумбаи и Ханои.
На почетокот од месецот министерот за животна средина Изет Меџити изјави дека загадувањето е комплексно прашање кое не може да се реши со една мерка, туку со повеќе.
Според податоците од македонското Министерство за животна средина и просторно планирање, од мерните станици поставени во скопските општини, традиционално најзагадена е скопската општина Аеродром, односно населбите Лисиче и Ректорат каде што загадувањето на воздухот со ПМ10 честички земено во просек изнесува 104 микгрограми на метар кубен.
Максимално дозволеното загадување со ПМ10 според светската здравствена организација е 50 микрограми на метар кубен.
Приведени демонстранти во Куба по протестите за проблемите со струјата
Кубанската влада соопшти дека уапсила неколку лица кои организирале протести откако ураганот го остави островот без струја по втор пат во последните неколку недели. Во Куба под комунистичка власт уличните протести се ретки, пишува новинската агенција Франс прес.
Обвинителството соопшти дека лицата уапсени во Хавана и централните провинции се обвинети за напад, јавен неред и оштетување на имотот.
Ураганот Рафаел предизвика дефекти во снабдувањето со струја во средата откако го погоди западниот дел на карипскиот остров со десет милиони луѓе како голема бура од трета категорија.
Пред само две недели, ураганот Оскар уби осум лица на истокот од островот за време на прекин на електричната енергија во земјата поради дефект на најголемата електрана на островот и недостиг на гориво.
Владата соопшти дека половина од граѓаните на Хавана повторно имаат електрична енергија, но повеќето од главниот град и соседните провинции немаат.
Организацијата за заштита на човекови права „Јустуција “ соопшти дека над десет луѓе се приведени во предградието на Хавана.
„Прогонот на луѓето во главниот град продолжува“, напишаа тие на платформата X, додавајќи дека уапсените мирно протестираат.
Куба со месеци страда од повеќечасовни прекини на струја и се наоѓа во средина на најтешка економска криза од распадот на Советскиот Сојуз во раните 1990-ти, обележана со зголемената инфлација и недостиг на основни производи.
Електричната енергија на островот се произведува од осум застарени електрани на јаглен, од кои некои се расипаа, како и седум електрани изнајмени од турски фирми и голем број дизел генератори.
Гроси ќе го посети Иран на 13 ноември
Шефот на нуклеарната организација на Обединетите Нации, Рафаел Гроси, ќе го посети Иран на 13 ноември и ќе започне консултации со иранските власти следниот ден, објавија државните медиуми на 10 ноември.
Шефот на Меѓународната агенција за атомска енергија (МААЕ) минатата недела изјави дека можеби ќе замине за Иран во следните денови да разговара за нејзината спорна нуклеарна програма и дека очекува да соработува со новоизбраниот претседател на САД, Доналд Трамп.
Долгогодишните прашања меѓу Иран, МААЕ и западните сили вклучуваат забрана на Техеран за збогатување ураниум од инспекциските тимови на МААЕ во земјата и неуспехот на Техеран со години да ги објасни трагите од ураниум пронајдени на непријавени локации.
Иран, исто така, ја засили нуклеарната активност од 2019 година, откако тогашниот претседател Трамп го напушти договорот од 2015 година што Иран го постигна со светските сили според кој го ограничи збогатувањето - што Западот го гледа како прикриен обид за развој на способност за нуклеарно оружје - и ги врати цврстите американски санкции за Исламската република.
Најмалку 17 луѓе загинале при израелски напади врз Газа
При израелски напад рано во неделата врз дом во кој се сместени раселените луѓе во северниот дел на Појасот Газа, загинаа најмалку 17 лица.
Директорот на болницата Ал-Ахли во градот Газа, д-р Фадел Наим, рече дека меѓу загинатите има девет жени и дека билансот веројатно ќе се зголеми додека продолжуваат спасувачките напори.
Тој рече дека тие биле убиени во напад на дом во урбаниот бегалски камп Џабалија, каде Израел спроведува офанзива повеќе од еден месец.
Засега нема коментар од израелската војска.
Израелските сили изминатиот месец ја опколија и во голема мера ги изолираа Џабалија и блиските градови Беит Лахија и Беит Ханун, дозволувајќи само малку хуманитарна помош. Десетици илјади луѓе побегнаа во блискиот град Газа.
Целата северна третина од Газа беше првата цел на копнената инвазија на Израел и го претрпе најтешкото уништување од 13-месечната војна, која беше предизвикана од нападот на Хамас во јужен Израел.
Израелските сили постојано се враќаа во деловите на Газа каде што оперираа претходно, велејќи дека милитантите на Хамас се прегрупирале.
Украински дронови предизвикаа привремено затворање на три аеродроми во Москва
Украина лансираше десетици беспилотни летала насочени кон Москва, принудувајќи привремено затворање на три аеродроми во главниот град, соопштија руските власти на 10 ноември.
Градоначалникот Сергеј Собјанин рече дека Русија соборила 32 украински беспилотни летала насочени кон Москва во текот на ноќта и утрото на 10 ноември, во еден од најголемите напади врз градот откако силите на Кремљ ја нападнаа Украина во 2022 година.
„Според прелиминарните информации, нема штета или жртви на местото на падот на урнатините. Службите за итни случаи се на местото“, напиша Собјанин на апликацијата за пораки Телеграм.
Руската федерална агенција за воздушен транспорт, објави дека аеродромите Шереметјево, Домодедово и Жуково привремено ги прекинале операциите „за да се осигура безбедноста на летовите на цивилните авиони“ поради нападите со беспилотни летала.
Аеродромите продолжија со работа неколку часа подоцна, јави државната новинска агенција ТАСС, повикувајќи се на информации од руската федерална агенција за воздушен транспорт.
Според московскиот регионален гувернер Андреј Воробјов, во нападот е повредено едно лице. Медиумите објавија дека нападите предизвикале пожар во село во областа Раменскоје, при што неколку куќи биле во пламен.
Русија речиси секојдневно известува за уништување на украински беспилотни летала, но нападите ретко го таргетираат главниот град.
Украинските власти често велат дека нивните напади со беспилотни летала врз Русија се насочени кон инфраструктурата клучна за воените напори на Москва и се одговор на континуираните напади на Русија врз Украина.
Од почетокот на војната, Украина е предмет на ноќни руски воздушни напади чија цел е критичната енергетска инфраструктура.
Бајден ќе му биде домаќин на Трамп во среда во Белата куќа
Американскиот претседател Џо Бајден ќе биде домаќин на новоизбраниот претседател Доналд Трамп на традиционалниот постизборен состанок во Овалната соба во Белата куќа во среда, е наведено во соопштението на Белата куќа.
Таквата средба е вообичаена меѓу претседателот во заминување и идниот претседател, и делумно има за цел да го означи почетокот на мирниот трансфер на власта под американската демократија.
Но, републиканецот Трамп, не беше домаќин на демократите Бајден, по изборите во 2020 година, кога Трамп ја загуби трката за реизбор.
Трамп ја побара претседателската функција четири години подоцна, а оваа недела ја победи потпретседателката Камала Харис.
Белата куќа соопшти дека Бајден му се јавил на Трамп минатата среда за да му честита и да го покани да се сретнат во Овалната соба.
Во говорот во четвртокот, Бајден рече дека го уверил Трамп „дека ќе ја насочи целата администрација да работи со неговиот тим за да обезбеди мирна и уредна транзиција. Тоа е она што американскиот народ го заслужува“.
Мултимедија
Најпосетени
Што треба да знаете