Вести
Македонците од Албанија го осудија Бушати поради навредливото именување
Македонскo друштво „Илинден" со седиште во Tирана и неговиот огранок за Голо Брдо, во име на Македонците во Албанија, упати остра реакција на адреса на шефот на албанската дипломатија, Дитмир Бушати, за употребата на терминот Славомакедонци.
„Во име на сите Македонци остро го осудуваме делот од изјавата на министерот за надворешни работи на Албанија, Дитмир Бушати, кој Македонците ги нарекува Славомакедонци. Ова е несоодветно, недговорно и навредливо. Бараме од министерт Бушати во иднина да не прави дефиниции без право и без основа. Ние мора да работиме да се градат искрени и пријателски односи меѓу Албанија и Македонија“, стои во реакцијата на „Илинден“.
Министерот Бушати, во интервју за тиранската телевизија Топ чанел, искажувајќи поддршка на платформата на политичките партии на Албанците во Македонија за преговорите за нова влада, Македонците ги нарекува Славомакедонци.
види ги сите денешни вести
Мерц: За царините со САД, членките на ЕУ можат да преговараат само заедно
Царинска војна им нанесува штети на сите и во таков вид на војна никој не е победник, порача денеска (9 мај) германскиот канцелар Фридрих Мерц на заедничка прес-конференција со претседателот на Европскиот совет, Антонио Кошта во Брисел.
„Ескалацијата на спорот за царините не е добра идеја. Најдоброто нешто би било тие да се сведат на нула за сѐ и за сите, истакна Мерц говорејќи за царините на увозот на стоки од ЕУ воведени од страна на администрацијата на американскиот претседател Доналд Трамп.
Мерц информира дека вчера телефонски разговарал со Трамп, при што му честитал за постигнатиот трговски договор меѓу САД и Велика Британија, но и му порачал дека такво нешто не можно да се прави со земјите членки на ЕУ одделно, бидејќи тие за трговијата преговараат заедно.
„Мојот впечаток беше е дека тој го прифати тоа и сега знае дека може да преговара само со сите нас заедно“, рече Мерц, додавајќи дека Трамп го поканил да го посети Вашингтон.
Според Мерц, во САД започнува дискусијата за штетите од царините по американската економија и луѓето почнуваат да го согледуваат тоа, што би можело да резултира со напредок во трговските преговори меѓу Брисел и Вашингтон.
Мерц меѓудругото, додаде дека во телефонскиот разговор, Трамп го информирал и за неговиот план за 30-дневен прекин на огнот, за кој изрази поддршка.
„Ја повикуваме Русија да се приклучи на патот кон траен договор, а доколку тоа не се случи, нема да се двоумиме да го зголемиме притисокот преку санкции заедно со нашите европски партнери и САД“, изјави германскиот канцелар.
Мерц нагласи и дека ЕУ мора да продолжи со поддршката на Украина во справувањето со руската агресија, потенцирајќи дека тој лично „цврсто стои зад Украина и украинската кауза“.
„Ќе направиме сѐ што можеме за да заврши оваа војна што е можно побрзо, но тоа може да се постигне само заедно со Украина. Украинците треба да бидат вклучени во тоа и треба многу јасно да ставиме до знаење каде стоиме и дека тоа е на страната на Украина. Драго ми е што гледам дека е така низ цела ЕУ, со еден или два исклучоци“, истакна Мерц.
Кошта од своја страна истакна дека Германија е многу доверлив партнер и придонесува во зајакнувањето на ЕУ, во премостување на разликите и во зацврстување на единството и дека од новата германска Влада очекува нова енергија во напорите за продолжување на изградбата на Унијата.
Мерц изрази задоволство што е присутен во Брисел на Денот на Европа кога се одбележуваат 75 години од Шумановата деклатација, која ги постави темелите на политичка соработка во Европа, првично во индустријата за јаглен и челик, но потоа и во други сектори, преку Европската заедница за атомска енергија и Европската економска заедница, па сѐ до Европската Унија каква што е денес.
Амбасадорот на ЕУ во Србија, Жофре: „Денеска треба да бидете во Украина, а не во Москва“
Шефот на делегацијата на Европската Унија во Србија, Емануел Жофре на 9 мај изјави дека геостратешката посветеност на Србија треба јасно да биде насочена кон Унијата и дека денеска „таа треба да биде во Украина, а не во Москва“.
И покрај критиките од Европската Унија, претседателот на Србија, Александар Вучиќ, е во посета на Москва, каде што присуствува на парадата по повод Денот на победата во Втората светска војна на 9 мај.
Билатералната средба со рускиот претседател Владимир Путин е нивна прва официјална средба од почетокот на руската инвазија на Украина во февруари 2022 година.
Жофре, потсети дека денеска (9 мај) се одбележува Денот на Европа, која веќе 75 години гради проект за мир, просперитет и демократија.
„Унијата се темели на клучни вредности и мора да биде способна да ги заштити граѓаните и да им донесе просперитет“, изјави Жофре за Српската радиотелевизија, нагласувајќи дека ова е особено важно денес кога војната се врати на европско тло.
Тој рече дека не треба да заборавиме дека Белград го ослободила Црвената армија заедно со Украинците, но дека треба да разбереме што се случува денес.
„Денес, за жал, имаме агресивна војна што ја уништува Украина, а Украинците се бранат. Мислам дека денес треба да бидеме во Украина, а не во Москва“, рече Жофре, коментирајќи го заминувањето на српскиот претседател Александар Вучиќ на воената парада во Москва.
Шефот на делегацијата на ЕУ рече дека „постои нов моментум за проширување и мора да се разбере дека овој момент треба да се искористи, пред сè преку спроведување на реформи“.
Најавувајќи ја посетата на претседателот на Европскиот совет, Анотнио Кошта на 12 мај и на високата претставничка на ЕУ за надворешна политика и безбедност, Каја Калас, на крајот од месецот, Жофре рече дека Унијата се фокусира на Западен Балкан и на Србија, дека инвестира политички капитал во Србија и дека ја сака Србија во ЕУ.
Тој истакна дека се потребни соодветни услови за тоа да се случи, спроведување реформи и промена на општеството.
„Гледаме дека многу граѓани на Србија бараат промени и реформи на улиците на Белград и Србија“, рече Жофре, осврнувајќи се на месеците студентски протести и блокади, каде што граѓаните бараат одговорност за смртта на 16 лица при уривањето на настрешницата на реконструираната Железничка станица во Нови Сад на 1 ноември.
Жофре додаде дека Србија има трговска размена со ЕУ, односно 60 проценти од српскиот извоз оди во Унијата, а странските директни инвестиции се главно од ЕУ.
„Мораме да го зајакнеме и да бидеме подготвени за светот денес и утре. Мора да знаеме во која насока сакаме да одиме“, рече тој.
Србија е во преговори за членство во Европската Унија од 2014 година.
Како кандидат за членство во ЕУ, Србија не отворила поглавја од преговорите од декември 2021 година.
Таа е во застој поради одбивањето да ја усогласи својата надворешна политика со онаа на Унијата и да воведе санкции врз Русија за нејзината инвазија на Украина.
Властите во Белград продолжија да ги негуваат односите со Москва и покрај предупредувањата од Брисел.
Средба на министрите за надворешни работи на ЕУ во украинскиот град Лвив
Министрите за надворешни работи на ЕУ се собраа во украинскиот град Лвив во петок(9 мај), каде што се очекува да го поддржат создавањето на специјален трибунал кој ќе истражува и ќе ја повикува Русија на одговорност за злосторствата на агресија извршени во Украина.
Собирот е симболичен знак на поддршка во истиот ден кога Русија со голема воена парада во Москва, го одбележува крајот на Втората светска војна и победата на Советскиот сојуз над нацистичка Германија.
„Важно е и симболично европските партнери да стојат рамо до рамо со Украина на Денот на Европа“, рече украинскиот премиер Денис Шмигал во објава на социјалните мрежи.
Тој ги поздрави делегациите од 35 земји и Советот на Европа, вклучувајќи ја и највисоката дипломатка на Европската Унија, Каја Калас.
„Нема да има неказнивост, ќе има одговорност за извршените злосторства“, рече Калас во четвртокот по состанокот на министрите на ЕУ во Варшава.
Специјалниот трибунал за злосторство агресија против Украина, како што се нарекува, треба да биде формализиран во Луксембург на 14 мај кога ќе се состане Комитетот на министри на Советот на Европа.
Меѓународниот кривичен суд (МКС) во Хаг веќе издаде налози за апсење на Путин поради киднапирање на украински деца, како и на четворица од неговите врвни команданти за таргетирање цивили.
Но, МКС нема надлежност да ја гони Русија за пофундаменталната одлука за започнување на инвазијата.
Се очекува новиот трибунал да не може да го суди Путин додека е на функција поради принципот на меѓународното право што им дава имунитет на претседателите, премиерите и министрите за надворешни работи.
Предлозите за формирање на трибуналот беа изнесени пред повеќе од две години, но расправиите околу неговата правна основа и како би функционирал го забавија напредокот.
Враќањето на американскиот претседател Доналд Трамп во Белата куќа се чини дека ги забрза напорите, бидејќи европските претставници стравуваат дека неговите планови за мировен договор би можеле да доведат до тоа Москва засекогаш да избега од правдата.
Почнува судењето за сообраќајката во која загина Фросина Кулакова
Во Основниот кривичен суд Скопје денеска (9 мај) треба да почне судењето против Васил Јованов, осомничен за кривично дело „тешки дела против безбедноста на луѓето и имотот во сообраќајот“ за сообраќајката на булеварот „Партизански одреди“ во Скопје во која во јануари, животот го загуби младата Фросина Кулакова.
Според обвинението, на 29 јануари 2025 година, Васил Јованов, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје. На пешачки премин, на црвено светло, удрил во Фросина Кулакова, која поминувала на зелено светло за пешаци.
Од силата на ударот, Фросина се здобила со тешки телесни повреди и починала на лице место. За делото за кое се товари Јованов е предвидена затворска казна до 20 години.
Случајот ќе го води судијката Снежана Марковска.
Во меѓувреме, Основното јавно обвинителство Скопје поднесе обвинителен предлог и против таткото на Васил, Зоран Јованов, за кривично дело „предизвикување општа опасност“ од член 288 став 4 во врска со став 1 од Кривичниот законик.
Обвинението се однесува на периодот од 04.11.2022 до 30.01.2025 година, во кој Зоран Јованов дозволувал на својот син Васил Јованов да управува патничко моторно возило „Пежо 207“, иако знаел дека синот нема возачка дозвола и е повеќекратен сторител на сообраќајни деликти вклучително и сообраќајната несреќа во која животот го загуби 22-годишната Фросина Кулакова.
Апелација ги зголеми казните на сопственикот на „Дурмо-турс“, одговорниот за транспорт и контролорите за технички преглед
Апелациониот суд Скопје му ја зголеми затворската казна на сопственикот на компанијата „Дурмо турс“, Дурмиш Белули, од четири на десет години. Зголемување на казната доби и одговорниот за транспорт во фирмата, Ремзи Мифтари кому казната му е зголемена од шест на десет години.
Првостепени, четиригодишини затворска казни на Белули и на Мифтари претходно им изрече Основниот Кривичен суд Скопје.
Скопска апелација ги одби како неосновани жалбите на дел од обвинетите за случајот „Ласкарци“. Делумно ја уважи жалбата на Основното јавно обвинителство Скопје, со тоа што им ги зголеми казните затвор на сопственикот на компанијата „Дурмо турс“ Дурмиш Белули, на одговорниот за транспорт во фирмата Ремзи Мифтари од шест на десет години, и од пет на по седум години казна затвор на двајцата вработени во станицата за технички преглед, Игор Ѓорѓиевски и Горан Дуковски.
Возачот Мануил Трифуновски останува со 14 години затвор и третиот контролор Јане Боваровски со пет.
„Пресудата на Основниот кривичен суд Скопје ја преиначи према обвинетите Д.Б.од с.Б.Г, И.Г.од Г., Г.Д. од Г., Ј.Б од Г. во делот на кривичната санкција, за обвинетиот Р.М. од с.Ч, Г по однос на засметувањето на мерката куќен притвор во изречената казна и висината на истата и за обвинетиот М.Т од Г. по однос на засметувањето на мерката куќен притвор во изречената казна и се осудуваат и тоа: обвинетиот Д.Б. на казна затвор во траење од 10-десет години; обвинетиот Р.М. на казна затвор во траење од 10-десет години, обвинетиот И.Ѓ. на казна затвор во таење од 7-седум години; обвинетиот Г.Д. на казна затвор во траење од 7-седум години и обвинетиот М.Т. на казна затвор во траење од 14 години“, соопшти на 8 мај Апелациониот суд Скопје.
Обвинети во овој случај се возачот на автобусот на „Дурмо турс“, сопственикот на фирмата, како и вработени во техничкиот центар на истоимената фирма, затоа што знаеле дека автобусот има неисправни сопирачки, а сепак го пуштале да го помине техничкиот преглед.
Автобусот на „Дурмо Турс“ во 2019 година излета од коловозната лента во ендек кај селото Ласкарци при што загинаа 16 луѓе, а 37 беа повредени.
Обвинението беше поднесено уште во јули 2019 година, но предметот остана заглавен во формални процедури во судот. Во кривичниот суд, доказната постапка се одолговлекуваше со месеци, затоа што беше побарано и спроведено супервештачење од Техничкиот факултет во Битола.
Филипче: Преговараме со сите политички партии за соработка на изборите
Лидерот на Социјадемократски сојуз (СДСМ), Венко Филипче не ја исклучува можноста за коалиција со Демократската унија за интеграција (ДУИ) и со Арбен Таравари од Алијанса за Алабанците на претстојните локални избори.
Одговарајќи на новинарско прашање за можна коалиција меѓу СДСМ и ДУИ и крилото на АА на Таравари, тој рече дека коалицијата од 14 партии е веќе потврдена и се прават заеднички советнички листи според неа. Додаде дека процесот за разговори со други партнери допрва почнува и ќе разговараат со сите политички партии.
„Ќе разговараме со сите политички партии, меѓутоа принципите на коалиција значат дека коалиционите партнери прво треба да се почитуваат, понатаму да се целосно согласни околу програмите кои ќе ги ветиме на граѓаните, односно да ги имплементираме научените лекции од претходните коалиции кои на некој начин го оштетија имиџот на СДСМ“, изјави Филипче.
Додаде дека неговата партија е „апсолутно подготвена за каков и да е изборен циклус во претстојниот период“, доколку има и предвремени парламентарни избори.
Не откри конкретни имиња на кандидати за градоначалници затоа што, како што рече, смета дека „не е фер тоа да го прави додека траат внатрепартиските процедури“.
Филипче ги коментираше и последните случувања во владината коалиција, откако Таравари излезе од ВРЕДИ и рече дека е само прашање на време кога таа коалиција ќе се распадне бидејќи како што вели, се покажало дека суштински ништо не ги врзува.
Алијансата за Албанците предводена од Таравари реши на претстојните локални избори да настапат со свои листи за советници. По оваа одлука неговите коалициските партии во ВРЕДИ одлучија коалицијата да стане партија, но без Алијансата.
Премиерот Христијан Мицкоски уверува дека владината коалиција е цврста, стабилна и со големо мнозинство, а последната средба со Таравари беше оценета како конструктивна.
Неодамна министерот за животна средина и вицепремиер Изет Меџити и лидерот на Демократското движење од коалицијата Вреди изјави дека очекува Таравари исто како што ја напушти коалицијата „Влен“ за претстојните локални избори, така да ја напушти и Владата и му порача дека „не може и да соработува со ДУИ и да биде дел од Владата“.
Индија тврди дека Пакистан извршил воздушни напади со „дронови и ракети“
Индиската влада во четврток (8 мај) соопшти дека Пакистан започнал воздушен напад преку ноќ користејќи „дронови и ракети“, пред Њу Делхи да возврати со уништување на систем за воздушна одбрана во Лахор.
„Пакистан се обиде да нападне голем број воени цели користејќи дронови и ракети“, соопшти индиското Министерство за одбрана. Оттаму додаваат дека „тие биле неутрализирани“ од системите за воздушна одбрана.
Њу Делхи соопшти дека целните области вклучуваат локации во Џаму и Кашмир, кој е под индиска администрација и индиската држава Пенџаб - вклучувајќи ги клучните градови Амритсар, Лудијана, Чандигар - како и Буџ во државата Гуџарат.
„Отпадоците од овие напади сега се собираат од голем број локации“, додаде Министерството за одбрана.
Министерството за одбрана соопшти дека во четврток наутро неговата војска „ги таргетирала радарите и системите за воздушна одбрана на голем број локации во Пакистан“, велејќи дека „одговорот бил во ист домен, со ист интензитет, како и на Пакистан“.
Се додава дека „веќе е дознаено дека системот за воздушна одбрана во Лахор е неутрализиран“.
Индија, исто така, го обвини Пакистан дека „го зголемил интензитетот на неиспровоцираното пукање преку Линијата на контрола користејќи минофрлачи и тешка артилерија“ преку де факто границата во Џаму и Кашмир.
Индија, исто така, соопшти дека бројот на луѓе убиени од пакистанско пукање по ескалацијата на насилството во среда се искачил на 16, вклучувајќи меѓу жртвите три жени и пет деца.
Индија додаде дека останува посветена на „неескалација, под услов таа да биде почитувана од страна на пакистанската војска“.
Се очекува Трамп да објави „трговски договор“ со Велика Британија
Соединетите Држави и Велика Британија наводно денеска (8 мај) треба да објават трговски договор што би можел да има импликации врз царините на претседателот Доналд Трамп, но обемот на договорот би можел да биде ограничен.
„Њујорк тајмс“ и „Политико“ објавија дека договорот ќе биде склучен со Велика Британија, повикувајќи се на повеќе лица запознаени со плановите, додека „Волстрит џурнал“ пишува дека тоа ќе биде само „рамка“ на договор.
Тоа би бил првиот ваков трговски договор откако Трамп воведе царини врз американските трговски партнери на 2 април.
Претседателот воведе царини од 10 проценти на увозот од целиот свет, вклучително и за Велика Британија, но привремено ги замрзна повисоките царини за десетици земји за да даде простор за преговори.
Трамп вчера напиша дека ќе биде објавен „голем трговски договор“ со „голема и високо почитувана земја“.
Сепак, медиумите и аналитичарите рекоа дека не е јасно дали е финализиран договорот на САД со Велика Британија или дали двете земји ќе објават само рамка за договор што ќе биде предмет на понатамошни преговори.
Официјален Лондон соопшти дека британскиот премиер Кир Стармер ќе ги даде „најновите информации“ за трговските разговори со Соединетите Држави во четврток.
„Разговорите за договор меѓу нашите земји продолжуваат со темпо и премиерот ќе информира за ова подоцна денеска“, изјави портпаролката на британската влада.
Стармер, кој како Трамп ја освои власта минатата година, се залагаше за трговски договор пред Трамп да го започне „ударот“ со зголемени царини врз Велика Британија и земјите ширум светот.
Постигнувањето договор по Брегзит со Соединетите Држави беше многу важно за Велика Британија откако таа излезе од Европската Унија на почетокот на деценијата.
Лондон е заинтересиран да постигне некаков договор со Вашингтон, пред самитот ЕУ-Велика Британија на 19 мај, поради ресетирање на врските со блокот од 27 земји.
Договорот меѓу САД и Велика Британија би можел да се покаже како проблематичен за ЕУ, која се бори да постигне прифатлив трговски договор со Соединетите Држави.
Велика Британија оваа недела склучи договор за слободна трговија со Индија, нејзин најголем таков договор откако ја напушти ЕУ, откако преговорите беа повторно започнати во февруари по американските закани за царини.
ЕУ останува најголемиот трговски партнер на Велика Британија, додека САД се најголемата единствена земја-трговски партнер на Велика Британија.
Трамп со недели тврди дека земјите се подготвуваат да склучат трговски договори со Соединетите Држави.
Извештаите сугерираат дека Вашингтон може да намали одредени царини за британските производи во замена за ослободување од данокот на дигитални услуги на Велика Британија што го плаќаат американските технолошки гиганти.
Лондон не возврати на царината од 10 проценти наметната од Трамп за увозот од Велика Британија, ниту на повисоките давачки од 25 проценти за челик, алуминиум и автомобилскиот сектор.
Се очекува Централната банка на Англија да ја намали својата клучна каматна стапка за четвртина поен во четврток, бидејќи планираните царини на Трамп се закануваат да го ослабат глобалниот економски раст.
Стармер го посети Вашингтон на крајот на февруари, делумно за да разговара за царините и си замина со надеж дека може да се постигне долгоочекуван договор.
Трамп во тоа време ја претстави можноста за „одличен“ договор, поздравувајќи го Стармер како тежок преговарач.
Стармер за време на неговата посета му врачи на Трамп покана да се сретне со кралот Чарлс III на втора државна посета за која Лондон се надева дека ќе ги зајакне трансатлантските врски.
Седумдест и осумгодишниот републиканец долго време е гласен обожавател на британското кралско семејство. Тој исто така има близок афинитет кон Велика Британија, бидејќи неговата мајка е родена во Шкотска, каде што тој поседува терен за голф.
Втор ден од конклавата за избор на нов папа
Најголемата конклава во историјата на Католичката црква треба да продолжи денеска, кога би можеле да се одржат четири круга гласање, бидејќи новиот папа не беше прогласен вчера, како што се очекуваше, по едно гласање.
Папата Франциск, роден во Аргентина, кој почина во април, беше избран на крајот од вториот ден, по пет круга гласање. Осум години претходно, беа потребни два дена Германецот Бенедикт XVI да се прогласи за папа.
Кардиналите вчера (7 мај) почнаа да избираат нов водач за 1,4 милијарди католици во светот. Вечерта, од специјално поставен оџак видлив од плоштадот „Свети Петар“ во Ватикан се издигаше црн чад, сигнализирајќи дека новиот папа не е избран.
За избор на папа е потребно двотретинско мнозинство, или 89 гласови. Кога од оџакот се појавува бел чад, тоа е сигнал дека е избран нов црковен водач.
Рекордни 133 кардинали од 70 земји учествуваат во тајното гласање, во споредба со 115 од 48 земји на последната конклава одржана во 2013 година. Растот ги одразува напорите на покојниот папа Франциск да го прошири досегот на Црквата за време на неговиот 12-годишен понтификат.
Нема јасни фаворити за нов папа, иако италијанскиот кардинал Пјетро Паролин и филипинскиот кардинал Луис Антонио Тагле се сметаат за водечки кандидати. Паролин беше државен секретар, втора највисока позиција во Ватикан, за време на речиси целиот понтификат на папата Франциск.
Неговата улога и умерените ставови за многу општествени прашања укажуваат дека доколку биде избран за папа, тој ќе ги продолжи политиките на својот претходник. Во исто време, изворите тврдат дека тој можел да помири различни фракции во Црквата.
Фаворит за нов папа од Азија, филипинскиот кардинал Луис Антонио Тагле е харизматичен умерен човек кој често се нарекува „азиски Франциск“. Шеесет и четиригодишниот Тагл, кој со Франциск споделува историја на застапување на сиромашните, мигрантите и другите маргинализирани групи, е познат по својот мисионерски дух и пастирски фокус.
Доколку стане јасно дека ниту еден кандидат не може да го освои потребното двотретинско мнозинство, се очекува гласовите да бидат пренасочени кон други кандидати, при што гласачите потенцијално ќе ги обединат своите гласови врз основа на географска припадност, доктринарни афинитети или заеднички јазик.
Други потенцијални кандидати за папа се Французинот Жан-Марк Авелин, Унгарецот Питер Ердо, Американецот Роберт Превост и Италијанецот Пјербатиста Пицабала.
Некои посакуваат новиот папа да ја продолжи визијата на Франциск за поголема отвореност и реформи, додека други копнеат по враќање кон традицијата. Многумина посочија дека сакаат попредвидлив, измерен понтификат.
Почна тридневниот прекин на огнот, засега мирно во украинските градови
Мирно е во украинските градови рано изутрината на 8 мај, откако стапи на сила тридневниот прекин на огнот прогласен од Русија. Засега нема извештаи за напади со дронови со долг дострел или лансирање ракети по последователните ноќи бомбардирање.
Украинските воздухопловни сили, сепак, соопштија дека руските авиони двапати лансирале насочувачки бомби врз регионот Суми во североисточна Украина во раните утрински часови на 8 мај.
Воздухопловните сили соопштија дека првите бомби биле лансирани речиси три часа откако прекинот на огнот стапил на сила. Втората рунда бомби била лансирана во рок од два часа, соопштија на Телеграм.
Нема информации за штети.
Украина не се обврза на прекин на огнот, велејќи дека Путин го објави само за да создаде впечаток дека сака да ја заврши војната.
Украинскиот претседател Володимир Зеленски во своето вечерно видео обраќање на 7 мај рече дека сирените за воздушен напад се вклучиле низ цела Украина во текот на денот по смртоносните ноќни напади.
„Преку ноќ, имаше уште еден руски напад со ракети и беспилотни летала - балистички напади и повеќе од 140 дронови во една ноќ. Беше гласно во Киев и во другите градови. Трагично, има ранети, има убиени“, рече Зеленски.
Тој исто така, додаде дека Украина стои зад својата понуда да почитува 30-дневен прекин на огнот во војната, која започна целосна инвазија на Украина во февруари 2022 година.
Путин го објави примирјето по повод годишната прослава на Денот на победата во Русија на 9 мај, кога се одбележува крајот на Втората светска војна во Европа.
Украина го отфрли потегот како симболичен и, заедно со Соединетите Држави, продолжува да повикува на минимално 30-дневно примирје.
Мултимедија
Најпосетени
Што треба да знаете