Вести
МОСТ - неправилно гласање, поткуп и агитација
Граѓанската асоцијација МОСТ на прес-конференција по завршување на гласањето ги наброја нерегуларносттие што нивните набљудувачи ги воочиле на терен. Имало непочитување на постапката на гласање и проблеми предизвикани од подносители на кандидатски листи и гласачи. Односно биле забележани случаи кога член на избирачкиот одбор од политичка партија откинал 5 гласачки ливчиња и му ги дал на друг член од политичка партија, кој отишол позади параванот и гласал. Гласачките ливчиња стуткани биле ставени во гласачката кутија. Потоа гласал човек кој не бил запишан во избирачкиот список. Гласале луѓе без претходно да се провери дали имаат траги од спреј. Набљудувачите на МОСТ забележале и нарушување на тајноста на гласањето и семејно гласање. На гласачко место во Аеродром човек гласал во име на друг гласач, оти на негово место веќе некој друг го дал гласот.
Во општина Карпош забележан е случај кога член на избирачки одбор од политичка партија го изнесол изводот од избирачкиот список надвор од гласачкото место. Неовластени лица евидентирале гласачи во посебни списоци, понатаму забележани се случаи на поткуп и агитација. МОСТ нотирале и слуачи на фотографирање на гласачко ливче.
Во текот на денот на бесплатната телфонска линија 080 080 080 и на neregulranosti.most.org.mk биле примени 60 пријави за граѓани кои не се запишани во Избирачкиот список.
види ги сите денешни вести
Нова кривична пријава за градоначалникот на Струга, Рамиз Мерко
Против градоначалникот на Струга Рамис Мерко е поднесена кривична пријава од ОВР Струга затоа што пред речиси три години, спротивно на законот, назначил в.д. директорка во училиште во општината што ја раководи.
Како што информира денеска Министерството за внатрешни работи, кривична пријава е поднесена против Р.М.(67) од Струга, поради постоење основи на сомнение за сторено кривично дело „несовесно работење во службата“.
„На 17.01.2022 година, во својство на градоначалник на општина Струга, тој спротивно на законските прописи, донел решение за избор и именување на в.д. директор на училиште во Струга. Тоа го направил иако знаел дека кандидатката што ја наименувал, не исполнувала низа услови од Законот за основно образование, не го положила испитот за директор во утврдениот законски рок и не поседувала соодветен сертификат за познавање англиски јазик, информира МВР во дневниот билтен.
И покрај тоа што таа не ги исполнувала условите за функцијата, пријавениот, наведува МВР, „и овозможил да добие решение и противправно да оствари парична корист во износ од 1.390.536 денари за вршење работни задачи како в.д. директор и како директор на училиштето“.
Инаку на претходно Основното јавно обвинителство (ОЈО) Струга поднесе обвинителен предлог против Мерко за несовесно работење во службата. Тоа беше осмо обвинение за струшкиот градоначалник.
Основното јавно обвинителство за гонење организиран криминал го товари струшкиот градоначалник и за злоупотреба на службената положба, за набавка на четири автомобили во вредност од околу 114.000 евра, меѓу кои и луксузен „Ауди А6“ во период кога Општината имала бликирана сметка.
Од 20 јуни 2023 година, Рамиз Мерко се најде на црната листа на Соединетите Американски Држави поради корупција и мешање во судски процеси, соопшти Стејт Департментот.
Времено суспендирани двајца специјализанти од детска клиника поради смртта на 14-месечното дете
Директорот на Универзитетската клиника за детски болести во Скопје Реџеп Мемеди околу случајот со смртта на 14-месечното бебе, донесе решение за времено отстранување на двајца здравствени работници - доктори специјалисти од здравствената установа, за кои се води дисциплинска постапка, согласно член 192 став 2 од Законот за здравствена заштита, до донесување на конечно решение во дисциплинската постапка. За ова попладнево информираа од Детската клиника.
„Врз основа на извештајот на Комисијата за стручен надзор, формирана од Министерството за здравство на Република Северна Македонија, во врска со случајот на починатото 14-месечно дете, каде се констатирани елементи на лекарски пропуст, в.д директорот на ЈЗУ Универзитетска клиника за детски болести на ден 18.10.2024 година, донесе одлука за формирање Комисија за водење на дисциплинска постапка и поднесе пријава за утврдување на дисциплинска одговорност за сторен дисциплински престап на здравствените работници- двајца доктори специјалисти кои биле дежурни и извршиле преглед на малото дете, наведуваат од Клиниката.
При направениот стручен надзор во Клиниката за детски болести и во Клиниката за респираторни болести кај децата - „Козле“, се констатирани одредени недостатоци и тоа системски, технички од аспект на опрема и стручни, информираше министерот за здравство Арбен Таравари во понеделникот.
Зборувајќи за овие две клиники во Скопје, тој соопшти дека во делот на системски недостатоци, констатирано е непостоење на препораки или алгоритми за тријажа на пациентите при прием и понатамошен третман.
„Исто така, констатирана е потреба од континуирана обука на докторите на Клиниката за детски болести за срцево-респираторна поддршка. Во однос на техничките недостатоци, во „Козле“ е констатирана потреба од соодветна апаратура за пружање респираторна поддршка“ инвазивна и неинвазивна, појасни Таравари.
Министерот додаде дека, исто така, констатирана е потреба од обезбедување видео-ларингоскоп за Детската клиника, како и унапредување во делот на организирање на транспортот на пациентите од една до друга установа.
Вчера пак, одговарајќи на новинарско прашање на прес-конференција, тој кажа дека се надева оти двајцата директори ќе преземат некакви мерки. Министерот подвлече дека очекува да има некаква одговорност.
Уапсен шефот на српската криминална група „Врачарци“, по кој трагаат повеќе држави
Министерот за внатрешни работи на Србија, Ивица Дачиќ, на 18 октомври изјави дека во координирана акција на повеќе полицајци, како и претставници на ЕУРОПОЛ, е уапсен Никола Вушовиќ, организаторот на организираната криминална група „Врачарци“.
Според информациите од Министерството за внатрешни работи на Србија, Вушовиќ е уапсен во Барселона, Шпанија, а во акцијата учествувале и полициите на Шпанија, Србија, Австрија, Германија, Хрватска, Словенија и на Република Српска.
Никола Вушовиќ во Србија е осомничен за три убиства - Александар Сарач (1985), Александар Халабрин (1994) и Драган Ристиќ (1959), се вели во соопштението.
Тој е осомничен и за четири кривични дела тешко убиство во обид против Самир Дивљановиќ (1979), познат како Милош Ниловиќ. Руњо (1989), Лазар Вукичевиќ (1989) и Страхиња Савиќ (1987).
За Никола Вушовиќ се распишани неколку потерници од Интерпол во неколку земји од ЕУ, рече Дачиќ.
Судот во Рим одбива да ги задржи мигрантите во Албанија
Судот во Рим ги отфрли наредбите за задржување на група мигранти во прифатен центар во Албанија и рече дека тие имаат право да бидат испратени во Италија.
Оваа одлука претставува удар за планот на италијанскиот премиер Џорџија Мелони да испрати баратели на азил надвор од Италија.
Во текот на оваа недела, 16 мигранти кои беа спасени во Медитеранот и однесени во Албанија со брод на италијанската морнарица станаа првата група на луѓе кои беа сместени во новиот центар во Ѓадер, откако беа преработени во пристаништето Шенѓин.
Четворица од нив веќе се вратиле во Италија поради здравствени причини или затоа што биле малолетни.
„Одбивањето да се докаже притворот во албанските структури и области се случува поради неможноста да се признае земјата на потекло на притворените лица како безбедна земја“, се вели во изјавата на претседателката на судот Лусијана Санџовани, додавајќи дека мигрантите „ имаат право да бидат донесени во Италија“.
Оваа одлука се однесува на 12-те мигранти кои се наоѓаат во Албанија.
Во Албанија можат да бидат испратени само мигранти од списокот од 22 земји кои Италија ги одреди како безбедни земји. Египет и Бангладеш се меѓу овие земји, но неодамнешната одлука за ова прашање на Европскиот суд на правдата го оневозможува нивното задржување во Албанија, се вели во соопштението на римскиот суд.
По одлуката на судот, италијанскиот министер за внатрешни работи, Матео Пјантедоси, рече дека ќе ја обжалат истата.
„Ќе продолжиме напред со цел да ја афирмираме нашата позиција преку важни институционални канали, преку судскиот механизам“, рече тој за новинарите.
Одлуката на римскиот суд беше критикувана и од партијата на Мелони, Браќата од Италија.
Некои политизирани судии одлучија дека нема безбедни земји на потекло“, напиша оваа партија во Х.
Тие сакаат да ги поништат границите на Италија и ние тоа нема да го дозволиме“, изјави овој политички субјект.
Добротворната група Си Воч ја поздрави одлуката на судот, велејќи дека со одлуката за испраќање на мигрантите во Албанија, Мелони го прекршила италијанското и меѓународното право.
Албанија и Италија во ноември минатата година постигнаа договор за сместување на мигрантите. Договорот, кој беше критикуван од организациите за човекови права, предвидува Албанија да прифаќа до 36.000 мигранти годишно, а барањата за азил на овие мигранти ќе се разгледуваат во два центри во Албанија.
Се вели дека петгодишниот договор ќе ја чини Италија 160 милиони евра годишно.
Според договорот, процедурите за мигрантите ќе се спроведуваат во два центри.
Епл се усогласи со руските власти, ја отстранува апликацијата за „Тековно време“
Епл ја информираше Радио Слободна Европа (РСЕ) дека ја отстранила апликацијата за Current Time (Тековно време - ТВ и дигитална мрежа на РСЕ) од руската верзија на својата App Store на барање на „Роскомнадзор“, руската агенција за регулирање на медиумите.
Епл во писмо за РСЕ изјави дека причината поради која ја отстранила апликацијата е тоа што содржи содржина што е нелегална во Русија и материјали од организација која руските власти ја сметаат за „непожелна“.
Тековно време е ТВ и дигитална мрежа на руски јазик управувана од РСЕ.
РСЕ, независна медиумска организација финансирана со грант од Конгресот на САД преку Американската агенција за глобални медиуми, емитува програма на 27 јазици низ 23 земји, главно насочени кон региони со ограничена слобода на медиумите. Нејзините проекти на руски јазик беа во фокусот на зголемениот владин притисок, особено по целосната инвазија на Русија на Украина.
Откако Москва ја започна својата целосна војна против Украина во февруари 2022 година, Роскомнадзор ги блокираше веб-страниците на РСЕ, вклучително и оние на Руската служба на компанијата, локално позната како Радио Свобода и Тековно време.
На 6 март 2022 година, РСЕ ги суспендираше операциите во Русија, по ескалацијата на владините активности, вклучително и петицијата на Руската Федерална даночна служба за банкрот на руската поделба на организацијата.
Овие мерки, според РСЕ, беа кулминација на долгогодишните напори на владата да ја попречи нејзината работа.
Руското Министерство за правда официјално ги прогласи активностите на РСЕ за „непожелни“ во февруари 2024 година.
Усогласеноста на Apple со руските власти е дел од поширок тренд. Американскиот технолошки гигант отстрани 25 VPN услуги од својата App Store во јули и уште 98 во септември.
Овие отстранувања предизвикаа загриженост кај независните медиуми, невладини организации и активисти на граѓанското општество, кои ја обвинија компанијата за помагање во сузбивањето на слободата на говорот во Русија. Тие го повикаа Apple да се спротивстави на активностите што ги поткопуваат меѓународните стандарди за човекови права и да ги врати блокираните VPN апликации.
Божиновска тврди дека побарала бугарски пасош поради економски потреби
„Ниту еден граѓанин на Македонија кој добил бугарско државјанство не се чувствува за Бугарин. Всушност тоа го видовме и на пописот во Македонија со екстремно симболичната бројка на попишани Бугари. Луѓето, како и јас, побарале бугарски пасош од една и единствена причина, економски потреби за работа надвор од Македонија“.
Ова го напиша министерката за енергетика Сања Божиновска како одговор на тврдењата на бугарската потпретседателка Илијана Јотова која денеска изјавила дека лично ги прегледала документите од апликацијата за стекнување бугарско државјанство на министерката за енергетика Сања Божиновска за да се увери дали таа навела оти има бугарска самосвест, пренесе БТА.
„Ако госпоѓата Јотова мисли дека измамата со внесени документи од бугарската држава, ќе го смени моето чувство дека сум Македонка, па и чувството на многу мои сограѓани, тогаш или не разбира дека политиката на подметнување им е пропадната или не разбира дека ние сме имале економска потреба, а таа и политичарите како неа, сме ги оставиле да фантазираат како да се наоѓаат во деветнаесеттиот век, напиша министерката.
Инаку како што пренесуваат бугарските медиуми Јотова изјавила:
„Јас лично ги видов нејзините документи и декларација, лично потпишана од неа, во која таа наведува дека има бугарско самосвест и потекло, истакнала Јотова во Ќустендил за време на тркалезната маса под наслов „Бугарите на Балканот надвор од границата по 1878 година. Кодекс на опстанокот“, рекла Јотова.
На ова македонската министерка во објавата пишува дека Јотова живее во фантазии од деветнаесеттиот век.
„Ниту еден граѓанин на Македонија нема потпишано изјава дека се чувствува за Бугарин, туку тоа го прават бугарски адвокати кои наплаќаат пари за да посредуваат“, наведува министерката за енергетика, рударство и минерални суровини Сања Божиновска во реакцијата објавена на нејзиниот Фејсбук профил по претходната изјава на бугарската потпретседателка Илијана Јотова дека лично ги видела нејзините документи од апликацијата за стекнување бугарско државјанство.
Инаку на последната прес конференција кога Божиновска беше запрашана дали се уште има бугарска самосвест со оглед на тоа што секој што земал бугарски пасош мора да се декларира како Бугарин, таа одговори дека мора да се консултира со адвокати.
Госпоѓата Јотова, како што посочува во објавата Божиновска, наместо со ситни полициски подметнувања добро е да почне да се занимава со потребата на Македонците во Бугарија, конечно да бидат признаени како малцинство и да им се овозможат основните човекови права.
Касами добил заканувачка порака
Четириесет и тригодишен жител на село Требош со иницијали Ј.В. бил повикан во СВР Тетово осомничен дека му се заканил со порака на телефон на градоначалникот на Тетово, Биљал Касами.
Министерството за внатрешни работи денеска соопшти дека за Ј.В. постои основано сомневање дека извршил кривично дело „загрозување на сигурност“.
Осомничен е дека се заканувал завчера, а бил пријавен вчера околу 10.30 часот во СВР Тетово од самиот градоначалник Касами, и еден час подоцна бил повикан во полиција.
„Градоначалникот на Општина Тетово Б.К.(49) од Тетово пријавил дека претходниот ден околу 23.40 часот на неговиот мобилен телефон добил порака со заканувачка содржина. По целосно расчистување на случајот ќе биде поднесен соодветен поднесок, наведува МВР во полицискиот билтен.
Перински: Граѓаните на референдум да се изјаснат за отповикување на градоначалник
На референдум да се отповикуваат градоначалниците што нема да ја извршуваат својата функција за која се избрани од страна на граѓаните. Ова го изјави за МИА министерот за локална самоуправа Златко Перински.
Отповикувањето на градоначалник е една од новините што треба да бидат дел од законското решение за локална самоуправа кое се предвидува да биде готово до март, а за кое дотогаш ќе се отвори широк консултативен процес во кој ќе бидат вклучени сите засегнати страни - експерти, градоначалници, претседатели на совети, граѓани сектор.
„Во суштина, отповикот на градоначалник врз основа на примерите кои пред да започне процесот ги разговаравме со експертскиот тим, би требало да биде преку референдумско изјаснување на оние кои истиот градоначалник го довеле на таа позиција на која што е. Мора да бидеме многу внимателни и сите измени да ги интегрираме согласно Уставот за да немаме после тоа проблеми и аномалии во донесувањето на истото законско решение. Значи навистина ќе се внимава на секој момент и затоа мислиме дека е најсоодветно оваа промена или оваа адаптација на законот да оди преку референдумско изјаснување на граѓаните од таа општина, во која што треба да се јави оваа можност во иднина, вели Перински.
Денеска е одржан и првиот иницијален состанок со експертскиот тим, кој во првата фаза треба да ги увиди слабостите на постојното законско решение преку детална анализа.
Главната интенција за можноста за отповикување на градоначалник, како што посочува Перински, произлегла од секојдната комуникација со граѓаните.
Новина во законот треба да биде и комуналната полиција за која министерот вели дека ќе им заштеди средства во буџетите на општините затоа што ќе се спречи девијантното однесување на поединци и нема да има потреба од дополнителни финансиски средства за санација на уништената урбана опрема.
Целото интервју со видео материјал ќе биде објавено утре. Во него министерот говори и за тоа зошто дел од општините не добија пари за инфраструктурни проекти, каков е неговиот став за финансирањето на здружението на граѓани - Албанска академија на науките и ументостите и дали ќе се кандидира за градоначалник на следните локални избори.
Бајден ги повика сојузниците да не попуштаат во поддршката за Украина
На 18 октомври, американскиот претседател Џо Бајден ги повика сојузниците во НАТО да „не попуштаат“ во поддршката за Украина, повеќе од две и пол години од почетокот на руската инвазија.
Сојузниците во НАТО мора „да продолжат да даваат поддршка“ додека Украина не постигне „праведен и траен мир“, рече Бајден во Берлин, каде што пристигна еден ден претходно, во проштална посета на еден од најверните американски сојузници во Европа.
При приемот на Бајден, германскиот претседател Франк Валтер Штајнмаер ја подвлече „непоколебливата поддршка на американскиот претседател за НАТО и Украина „во најопасниот момент од крајот на Студената војна“.
Германскиот премиер Олаф Шолц изјави дека НАТО ќе продолжи да ја поддржува Украина „со сите сили“ во борбата против руската инвазија, но мора да се грижи НАТО да не стане страна во конфликтот.
„Ние ја поддржуваме Украина со сите сили и истовремено обезбедуваме НАТО да не стане страна во војната за да спречиме да се претвори во уште поголема катастрофа“, рече германската канцеларка.
Зборувајќи за ситуацијата на Блискиот Исток, Бајден рече дека смртта на лидерот на Хамас Јахја Синвар отвора можност за „пат кон мирот“. Тоа е можност за „подобра иднина во Газа, без Хамас“, рече американскиот претседател.
Американскиот претседател разговара за Украина со лидерите на Германија, Франција и Велика Британија во Берлин, еден ден откако претседателот Володимир Зеленски на лидерите на ЕУ и на највисоките претставници на НАТО им претстави низа мерки за кои рече дека ќе и помогнат на неговата земја да стави крај на конфликтот и 31- месечна руска инвазија.
Посетата на Бајден на Берлин доаѓа откако Русија ги засили нападите врз украинските градови и инфраструктура, што кулминираше со, како што рече еден украински функционер, „еден од најмасовните“ напади со беспилотни летала врз земјата.
Хамас го потврди убиството на Јахја Синвар, не ги ослободува израелските заложници
На 18 октомври, висок функционер на Хамас ја потврди смртта на водачот на групата, Јахја Синвар, кој беше убиен од израелски војници во операција во јужниот дел на Газа, според соопштението на израелските одбранбени сили (ИДФ).
Синвар (62) е обвинет за организирање и водење на смртоносниот напад на Хамас врз Израел на 7 октомври 2023 година, што го стави на врвот на листата на удари на Израел во видео изјава на 18 октомври, функционерот на Хамас, Калил ал-Хаја, рече дека Синвар бил убиени во акција.
Висок функционер на Хамас рече дека групата, која САД и ЕУ ја сметаат за терористичка, ќе продолжи на својот пат „кон остварување на амбициите на палестинскиот народ“. Смртта на Синвар, рече тој, само ќе ја зајакне групата.
Тој додава дека израелските заложници нема да бидат вратени додека не заврши агресијата врз Газа и целосното повлекување на израелските сили од Појасот Газа.
Ал-Хаја е најстариот човек во Хамас по водачот Синвар, кој беше убиен за време на рутинска потрага по членовите на Хамас во Рафах во четвртокот.
Смртта на Синвар, неколку месеци откако беше именуван за главен лидер на Хамас, ја нагласува тешкотијата со која се соочува палестинската група во заштитата на високо дефинираните цели од Израел, но веројатно нема значително да влијае на текот на војната во Појасот Газа.
Мултимедија
Најпосетени
Што треба да знаете